Magkakaroon na ng sariling pondo at tauhan ang Independent Commission for Infrastructure (ICI) matapos aprubahan ng Office of the President ang P41.5 milyong operating budget nito hanggang sa katapusan ng 2025.

Ayon kay ICI Executive Director Brian Keith Hosaka, inaprubahan na ng Malacañang, batay sa rekomendasyon ng Department of Budget and Management (DBM), ang paglalabas ng pondo mula sa 2025 contingent fund.

Itinatag ang ICI noong Setyembre bilang tugon sa korapsyon sa flood control projects ng Department of Public Works and Highways (DPWH). Sa loob lamang ng dalawang buwan, nakapagsumite na ito ng tatlong ulat sa Office of the Ombudsman, na nagrerekomenda ng kaso laban sa mga mambabatas at opisyal ng DPWH na umano’y sangkot sa “ghost” at overpriced projects.

Sinabi ni Hosaka na gagamitin ang pondo para sa operational at capital expenses ng komisyon hanggang 2025, habang aprubado na rin ang 172 contractual positions para sa mga bagong empleyado, kabilang ang mga abogado, accountant, at engineer.

Sa ngayon, karamihan sa mga tauhan ng ICI ay naka-detalye pa mula sa ibang ahensya, at hindi pa rin nakatatanggap ng suweldo ang mga opisyal, kabilang si Hosaka.

Matapos ang ilang pagtutol, pumayag na rin ang ICI na buksan sa publiko ang mga pagdinig nito sa pamamagitan ng online livestream, at kasalukuyang binabalangkas ang mga patakaran para rito.

Ang ICI headquarters ay matatagpuan sa Department of Energy compound sa Taguig City.

Inamin ni Anjo Yllana na hindi totoo ang mga sinabi niya tungkol sa umano’y “kabit” ni Senate President Tito Sotto, at nilinaw na “bluff” lang daw ang kanyang pahayag.

Sa panayam ng PEP.ph, sinabi ng dating Eat Bulaga host na nagkaayos na sila matapos siyang makausap nina Vic at Maru Sotto, mga kapatid ng senador. Ayon kay Anjo, nagtapos ang kanilang usapan sa “ceasefire” matapos nilang aminin na nagkaroon lamang ng “miscommunication.”

Kwento ni Anjo, nagsimula ang gulo nang batikusin siya ng mga troll na aniya’y galing sa kampo ni Sotto dahil sa kanyang mga komento laban sa pamahalaan.

“Nagbibigay lang ako ng opinyon. Sabi ko nga, ayusin naman ng gobyerno ang pamamalakad. Eh si Tito Sen, kaalyado ng kasalukuyang administrasyon, kaya siguro ako binabanatan,” paliwanag niya.

Dahil sa inis, nabigkas niya raw ang kontrobersyal na biro:

“Sabi ko, ‘Tito Sen, ayusin mo ‘yung trolls mo. Kapag ‘di tumigil ‘yan, ilalabas ko mga chicks mo.’ Bluff lang ‘yun, pero ‘di ko akalaing lalaki ng ganito ang gulo.”

Pagkatapos ng tensyonadong pag-uusap, sinabi ni Anjo na nagkasundo sila ni Vic at Maru na huwag nang palakihin pa ang isyu.

“Wala kaming sorry-sorry, pero ceasefire na. Wala na akong sasabihin tungkol kay Tito Sen. Sinabi ko rin sa kanila, bluff lang talaga ‘yun,” aniya.

Dagdag pa ni Anjo, tumigil na rin siya sa pagpo-post ng mga vlog ukol sa usaping ito bilang tanda ng pagtatapos ng isyu.

Nilinaw ng Malacañang na walang kinalaman si Pangulong Ferdinand Marcos Jr. sa isinasagawang imbestigasyon ng House of Representatives hinggil sa kontrobersyal na Manila Bay dolomite beach project na ipinapatupad noong panahon ng Duterte administration.

Ayon kay Presidential Communications Office Undersecretary Claire Castro, iginagalang ng Pangulo ang separation of powers at hindi makikialam sa mga hakbang ng Kongreso.

“Trabaho ng House of Representatives ang magsagawa ng imbestigasyon. Hindi ito pakikialaman ng Pangulo,” pahayag ni Castro.

Dagdag pa niya, layon ng imbestigasyon na malaman kung may anumalyang naganap o kung nagdulot ng pagbaha sa Metro Manila ang proyekto.

Binigyang-diin ni Castro na hindi politikal ang naturang imbestigasyon.

“Kung proyekto man ito ng nakaraang administrasyon, hindi ibig sabihin na hindi na puwedeng siyasatin. Hindi naman tama na agad itong ituring na politika,” aniya.

Ang pagdinig sa dolomite beach project ay itinakda ni House public accounts committee chairman Rep. Terry Ridon sa Nobyembre 17.

Matatandaang itinayo ang dolomite beach noong 2020 bilang bahagi ng Manila Bay cleanup, ngunit ayon kay Ridon, hindi ito kasama sa orihinal na master plan ng rehabilitasyon.