Ginunita ang yumaong “Meteor Garden” star na si Barbie Hsu sa unang anibersaryo ng kanyang pagpanaw sa pag-unveil ng isang memorial statue na dinisenyo mismo ng kanyang asawa na si DJ Koo.

Pumanaw si Barbie, na mas kilala bilang Big S, noong Pebrero 2, 2025 sa edad na 48 dahil sa pneumonia matapos mahawaan ng influenza habang nasa biyahe sa Japan.

Inilantad ang estatwa sa Chin Pao San Cemetery sa Taiwan, kung saan siya nakalibing. Pinamagatang “Eternal Orbit of Hsi-Yuan” ang memorial, hango sa kanyang Chinese name.

Ayon sa artist na si Chen Dao-Lee, gawa ang instalasyon sa stainless steel at brass, may sukat na humigit-kumulang 72 square meters at taas na 330 sentimetro.

Dumalo rin sa unveiling ang ilan sa mga dating co-star ni Barbie sa “Meteor Garden” na sina Jerry Yan, Rainie Yang, at Vic Chou, bilang pakikiisa sa pag-alala sa minamahal na aktres.

Pumanaw na sa edad na 71 ang Emmy-winning actress na si Catherine O’Hara, kilala bilang ina ni Kevin sa “Home Alone” at bilang si Moira Rose sa hit series na “Schitt’s Creek,” ayon sa kanyang management agency.

Kinumpirma ng kanyang manager ang balita ngunit walang ibinigay na detalye sa sanhi ng pagkamatay. Ayon sa ulat, isinugod si O’Hara sa ospital mula sa kanyang tahanan sa Los Angeles bago magbukang-liwayway.

Ipinanganak sa Toronto noong 1954, nagsimula ang kanyang karera sa comedy theater na Second City, kung saan nakatrabaho niya si Eugene Levy—na magiging matagal niyang collaborator. Sumikat siya sa mga pelikulang “Beetlejuice,” “The Nightmare Before Christmas,” at lalo na sa “Home Alone” (1990), na nagbigay sa kanya ng pandaigdigang kasikatan.

Sa bagong henerasyon, mas nakilala siya bilang si Moira Rose sa “Schitt’s Creek,” isang papel na nagpanalo sa kanya ng Emmy, Golden Globe, at SAG Award.

Nagpaabot ng pakikiramay ang mga kasamahan niya sa industriya, kabilang si Macaulay Culkin, at maging ang Punong Ministro ng Canada na si Mark Carney, na tinawag siyang isang alamat ng Canadian comedy.

Iniwan ni Catherine O’Hara ang isang pamana ng tawa at kahusayan sa mahigit limang dekada sa pelikula at telebisyon—isang bituin na hindi malilimutan.

Mukhang hanggang isang termino lang ang balak ni Senator Robin Padilla.

Sa isang interview kay Julius Babao, ibinunyag ng TV host at misis ng senador na si Mariel Rodriguez na desidido na ang kanyang asawa na hindi na tumakbo sa 2028 elections. Ang dahilan? Feeling ni Mariel, “hindi deserve” ng publiko ang serbisyo ng kanyang mister.

‘Public Servant, Not Politician’ Ipinagmalaki ni Mariel na simula nang manalo si Binoe, wala silang naging lifestyle upgrade na galing sa kaban ng bayan.

“Wala kaming bagong kotse, wala kaming bagong bahay… wala kaming bagong kung anuman na katas ng pagiging senador ni Robin,” diin ni Mariel.

Dagdag pa niya, hindi “politiko” ang tingin niya sa asawa kundi isang tunay na public servant.

Bakit ayaw na? Umamin si Mariel na nasasaktan siya tuwing naba-bash o na-a-out of context si Robin. May mga moments pa nga na gusto na niyang patigilin ito sa paglilingkod dahil sa frustration.

Bukod sa kritisismo, nababagalan din daw si Robin sa sistema at proseso sa gobyerno kaya ayaw na nitong ituloy ang karera sa pulitika.

No to VP Tinuldukan din ni Mariel ang mga usap-usapan tungkol sa pagtakbo ni Robin sa mas mataas na posisyon, gaya ng Vice President.

“Nate-turn off siya (sa mga nagsasabing tumakbo siyang vice president). Nagdesisyon na siya, hindi na siya tatakbo. Ayaw na niya,” paliwanag ni Mariel.

Aniya, walang ambisyon sa kapangyarihan si Robin at ang tanging layunin lang nito mula noon ay ang makatulong—lalo na sa mga indigenous people at mga kapatid na Muslim na umaasa sa kanya.