Sinimulan na ng US Justice Department ang paglalabas ng matagal nang hinihintay na mga dokumento kaugnay ng kaso ng convicted sex offender na si Jeffrey Epstein, ngunit agad itong sinalubong ng batikos dahil sa malawakang pag-redact o pagtatakip ng mahahalagang detalye.
Kabilang sa mga inilabas na files ang mga litrato na nag-uugnay kay Epstein sa ilang kilalang personalidad, gaya nina dating US President Bill Clinton, rock legend Mick Jagger, at pop icon Michael Jackson. Gayunman, maraming pahina ang halos puro itim dahil sa censorship, dahilan para lalo pang umigting ang hinala ng publiko sa posibleng cover-up ng mga makapangyarihang sangkot.

Sa isang dokumento, pitong pahina na naglalaman ng listahan ng 254 na masseuse ang tuluyang tinakpan ang lahat ng pangalan, ayon sa DOJ ay para protektahan ang posibleng mga biktima. Mayroon ding mga larawang nagpapakita ng mga hubad o bahagyang hubad na indibidwal, pati mga kuha ni Epstein at ng kanyang mga kasama na may hawak na baril—ngunit halos lahat ay may tinakpang mukha.

Kasama rin sa mga dating hindi pa nakikitang larawan si Ghislaine Maxwell kasama ang disgrasyadong si dating Prince Andrew, at isang litrato ni Clinton na nasa hot tub, na bahagi rin ay naka-redact.

Lumaking bahagi ng isang pamilyang hinahangaan sa ganda, inamin ni Lorin Gutierrez Bektas na minsan niyang naranasan ang insecurities tungkol sa kanyang hitsura—lalo na dahil sa kanyang “different look” mula sa Turkish features ng kanyang ama, si Yilmaz Bektas. Ngunit sa kanyang 20s, natutunan niyang yakapin kung sino siya at maging komportable sa sariling balat.

Si Lorin ay senior student sa Pepperdine University sa California, kung saan siya kumukuha ng Advertising. Bukod sa pag-aaral, abala rin siya bilang bagong ambassador ng Brilliant Skin. Aniya, pumapayag lang siyang mag-endorso ng produktong epektibo sa kanya, lalo na’t matagal siyang nakipaglaban sa acne at sensitive skin.

Pagdating sa mga beauty standards, simple lang ang payo ni Lorin: “You will never please everyone. Mas mahalagang hanapin ang kumpiyansa sa sarili kaysa sa opinyon ng iba.”

Mula naman sa kanyang ina, Ruffa Gutierrez, natutunan niyang “laging maging presentable dahil hindi mo alam kung anong oportunidad ang darating.” Habang mula sa kanyang lola, Annabelle Rama, natutunan niyang “laging magdagdag ng pirasong alahas sa bawat outfit.”

Sa kabila ng kanyang busy schedule, sinisiguro ni Lorin na alagaan ang sarili—mula sa pagha-hiking, pag-inom ng maraming tubig, hanggang sa simpleng skincare habits.

Sa ngayon, nakatutok siya sa pagtatapos ng kolehiyo sa 2026, ngunit bukas pa rin siya sa posibilidad ng showbiz sa hinaharap. “Never say never,” ani Lorin, “life is short.”

Muling pinatunayan ng K-pop girl group na TWICE ang kanilang lakas sa Pilipinas matapos punuin ang Philippine Arena sa Bulacan para sa kanilang sold-out concert kagabi, bilang bahagi ng “This Is For” world tour na inorganisa ng Live Nation Philippines.

Binuksan ng grupo ang gabi sa enerhikong lineup na kinabibilangan ng “This Is For,” “Strategy,” “Make Me Go,” “Set Me Free,” “I Can’t Stop Me,” “Options,” at “Moonlight Sunrise.”

Sinundan ito ng mga paborito ng fans tulad ng “Mars,” “The Feels,” “Cry For Me,” at “Hell in Heaven.” Pero ang pinakanagpasigaw sa crowd ay ang solo performances ng bawat miyembro, kung saan ipinakita nila ang mga bagong kanta mula sa paparating nilang 10th anniversary special album.

Kabilang dito sina Tzuyu sa “Dive In,” Mina sa “Stone Cold,” Nayeon sa “Meeee,” Dahyun sa “Chess,” Chaeyoung sa “Shoot,” Jihyo sa “ATM,” Sana sa “Decaffeinated,” at Momo na nagpasayaw sa “Move Like That.”

Hindi rin pinalampas ng TWICE ang kanilang mga klasikong hit songs tulad ng “Fancy,” “What Is Love?,” “Dance the Night Away,” at “Feel Special,” na sabay-sabay kinanta ng mga Filo Onces.

Bagama’t hindi nakadalo si Jeongyeon dahil sa kalusugan, nangako ang leader na si Jihyo na sa susunod nilang balik-Pinas, magiging kumpleto na ang grupo.

Tinapos ng TWICE ang kanilang ikatlong concert sa bansa sa masayang awitin ng “Signal” at “Talk That Talk,” habang umaalingawngaw ang sigawan ng fans—patunay na walang sawang pagmamahal ng mga Pilipino sa kanilang K-pop queens.