Naghain si House Majority Leader Sandro Marcos ng House Bill 7432 na naglalayong ipatupad ang “no work, no pay” policy para sa mga miyembro ng Kongreso, upang matiyak na ang sahod ng mga halal na opisyal ay kapalit ng aktuwal na trabaho.

Sa panukala, matatanggap lamang ng mga mambabatas ang kanilang sahod—na umaabot sa ₱290,000 hanggang ₱330,000 kada buwan—kung sila ay dumaralo at aktibong nakikilahok sa plenary sessions, committee hearings, at iba pang opisyal na gawain. Ang mga hindi papasok nang walang valid na dahilan ay babawasan ng sahod.

Papayagan lamang ang absences kung may medical certification, opisyal na misyon, awtorisadong biyahe, o aprubadong leave. Ituturing ding present ang mga dumadalo sa Commission on Appointments, Electoral Tribunal, at bicameral conference committees.

Babantayan ng sekretaryat ng bawat kapulungan ang attendance, at gagawing publicly accessible ang mga rekord para sa transparency. May parusa rin sa sinumang mahuhuling nagsisinungaling sa attendance o tumatanggap ng sahod nang hindi gumaganap ng tungkulin.

Inihain ang panukala kasunod ng mga isyu sa matagal na pagliban ng ilang mambabatas, partikular ang kaso ni Sen. Ronald “Bato” dela Rosa, na ilang buwang hindi dumadalo sa mga sesyon—na muling nagbukas ng usapin sa pananagutan at sahod ng mga halal na opisyal.

Hindi na lang basta limang taon ang itatagal ng prangkisa ng mga consolidated Public Utility Vehicles (PUV). Ayon kay LTFRB Chairman Vigor Mendoza II, pinag-aaralan na nilang i-extend ito hanggang pitong taon para tumugma sa haba ng bayaran ng loan sa bangko.

Para sa Peace of Mind ng Operators Layon ng hakbang na ito na bigyan ng “confidence” ang mga kumuha ng loan para sa modernization. Kung pito ang taon ng hulugan sa sasakyan, dapat pito rin ang taon ng prangkisa para hindi kabado ang mga operator sa renewal.

Bukod sa haba ng prangkisa, heto pa ang mga dapat abangan:

• Mystery Riders is Real: Maglalabas ang LTFRB ng mga “mystery riders” o mga incognito inspectors para silipin kung maayos ba ang serbisyo sa mga terminal at sasakyan. Bawal ang sira-sirang upuan at maruming loob ng PUV!
• Fare Hike Hearings: Magsisimula na ulit ang mga pagdinig para sa hirit na taas-pasahe ngayong Pebrero, kasabay ng pamimigay ng fuel subsidy para sa mga driver.
• Regulated Carpooling? Pinag-iisipan na ring ibalik ang carpooling sa ilalim ng TNVS para makabawas sa grabeng traffic sa Metro Manila.
• Digital na Lahat: Para iwas-fixer, tinatapos na ng LTFRB ang kanilang transition sa digital process. Ibig sabihin, mas mabilis na ang application at hindi na kailangang pumila nang pagkahaba-haba.

Siguradong maraming pagbabago sa kalsada ngayong 2026, kaya stay tuned lang tayo para sa mas komportableng byahe!

Ito ang mainit na usap-usapan sa social media matapos mag-viral ang hinaing ng mga traveler—kabilang na ang TV host na si Bianca Gonzalez—tungkol sa tila “ginto” na presyo ng domestic flights. Agad naman itong inaksyunan ng Department of Tourism (DOT) at Department of Transportation (DOTr) para gumaan ang bulsa ng mga Pinoy.

Bakit nga ba sobrang mahal? Ayon kay Presidential Communications Undersecretary Claire Castro, may mga rason kung bakit nagmamahal ang ticket:

• Maliit na Eroplano: Ang mga destinasyong gumagamit ng maliliit na plane (70 seats) ay mas mahal kaysa sa malalaking jet (200 seats).
• Fuel Surcharge: Dahil sa pabago-bagong presyo ng langis sa mundo.

Good News: Presyo, Bababa na! Sa pakikipag-usap ni Acting Transportation Secretary Giovanni Lopez sa Philippine Airlines (PAL) at Cebu Pacific, pumayag na ang mga ito na bawasan ang kanilang pamasahe, lalo na ang ruta patungong Siargao.

Tinanggal na rin ng mga airline ang kanilang “two most expensive price buckets” o ‘yung mga pinakamahal na kategorya ng ticket para sa ilang local destinations.

Transparency ang kailangan Hindi lang bawas-presyo ang hirit ni Tourism Secretary Christina Frasco. Gusto ng DOT na magkaroon ng monthly publication ng ticket prices at magtakda ang Civil Aeronautics Board (CAB) ng malinaw na price ceiling o limitasyon sa taas ng presyo.

“I invite our airlines to help us, help Filipino travelers by providing competitive prices for domestic tourism,” pakiusap ni Frasco.

Sa kabila ng isyung ito, number one pa rin ang Pilipinas sa Southeast Asia pagdating sa domestic tourism na may 134 million trips noong nakaraang taon. Pero siyempre, mas masarap mag-travel kung hindi masakit sa budget, ‘di ba?