Nahaharap sa matitinding hamon ang milyun-milyong Afghan na sapilitang ibinalik sa kanilang bansa matapos higpitan ng Pakistan at Iran ang deportasyon. Ayon sa International Organization for Migration (IOM), mahigit limang milyong Afghan na ang umuwi mula Setyembre 2023—katumbas ng 10% ng populasyon ng Afghanistan.
Marami sa mga bumalik ay dekada nang naninirahan sa ibang bansa at ngayon ay kailangang magsimulang muli sa isang bansang lugmok sa kahirapan, kakulangan sa trabaho, at krisis sa kapaligiran.
Batay sa mga survey, 80% ng mga returnee ay walang permanenteng tirahan at napipilitang manirahan sa pansamantalang bahay na gawa sa putik o bato. Tatlo sa apat ang hindi kayang magbayad ng upa, at siksikan ang maraming pamilya sa iisang silid.
Sa hanapbuhay, 11% lang ng mga bumalik ang may regular na trabaho, habang ang buwanang kita ay umaabot lamang sa $22 hanggang $147. Problema rin ang kakulangan sa tubig at kuryente, lalo na sa mga pamilyang pinamumunuan ng kababaihan.
Bilang tugon, sinabi ng pamahalaan ng Afghanistan na mahigit 3,000 lupain na ang naipamahagi sa mga returnee, kasabay ng tulong tulad ng pamasahe, SIM card, at kaunting ayuda—ngunit para sa marami, malayo pa ito sa sapat para makabangon.