Umani ng matinding batikos ang biglaang pagbabalik ng P243.4 bilyong unprogrammed appropriations sa bicameral deliberations, mas mataas kaysa sa bersyon ng Kamara at Senado. Ikinabahala ng mga mambabatas at civil society ang kakulangan ng malinaw na paliwanag at ang isyung transparency at accountability.

Mariing tinuligsa nina Rep. Leila de Lima at Rep. Chel Diokno ang hakbang, na tinawag ni Diokno na patunay na “old habits die hard.” Matagal nang kinukuwestiyon ang unprogrammed funds bilang anyo ng “nakatagong pork,” at naiugnay na rin sa mga proyektong kasalukuyang iniimbestigahan sa korapsyon.

Ipinunto ni De Lima na kung mahalaga ang mga proyekto, dapat sana’y programmed ang pondo at hindi inilagay sa wala pang tiyak na pagkukunan—na aniya’y posibleng labag sa Konstitusyon. Sa panig ng Senado, ipinaliwanag ni Sen. Sherwin Gatchalian na ang pondo ay magmumula sa bagong o sobrang kita at foreign loans, at hindi bahagi ng pangunahing 2026 budget, at mas “efficient” umano para sa agarang paglabas ng pondo.

Bagama’t inaprubahan na ng bicam, nananatiling posible ang pagbawas o pag-veto ng Pangulo sa ilang line items, gaya ng ginawa sa nakaraang budget.

Inaresto ng National Bureau of Investigation (NBI) si super contractor Sarah Discaya noong Disyembre 18 kaugnay ng umano’y P96.5-milyong ghost flood control project sa Davao Occidental.

Kinumpirma ni Pangulong Ferdinand “Bongbong” Marcos Jr. na naisilbi na ang warrant of arrest laban kay Discaya at siyam pang indibidwal, na nahaharap sa mga kasong graft at malversation—mga kasong hindi piyansable. Si Discaya ay kasalukuyang nasa kustodiya ng NBI at sumasailalim sa standard arrest procedures.

Ayon pa sa pangulo, walo pang opisyal ng DPWH ang nagpahayag ng intensyong sumuko kaugnay ng kaso. Wala pang inilalabas na detalye ang mga awtoridad sa iba pang akusado at iskedyul ng pagsuko.

Nauna nang iginiit ng administrasyon na may mga pag-aresto bago mag-Pasko bilang bahagi ng kampanya laban sa korapsyon sa mga pekeng at substandard na proyekto.

Matapos ang ilang buwang pagkaantala, sisimulan na sa Bisperas ng Pasko, Disyembre 24, ang rehabilitasyon ng EDSA na tatagal ng walong buwan. Ayon sa Department of Public Works and Highways (DPWH), mas pinaiksi rin ang proyekto at ibinaba ang badyet mula P17 bilyon tungo sa P6 bilyon.

Ipatutupad ang pagkukumpuni sa dalawang yugto na tig-apat na buwan. Saklaw ng unang phase ang bahagi mula Roxas Boulevard hanggang Orense Street sa Makati, habang ang ikalawang phase ay sasaklaw sa natitirang bahagi ng EDSA hanggang Caloocan. Magsisimula ang mga trabaho alas-11 ng gabi sa Disyembre 24 at inaasahang matatapos pagsapit ng Abril o Mayo 2026.

Gagawin ang road works sa gabi at tuwing weekend upang mabawasan ang abala sa trapiko, kabilang ang reblocking at asphalt overlay ng piling lane at ng EDSA bus lane. Gagamitin ang matibay na stone mastic asphalt na karaniwang ginagamit sa mga expressway at paliparan.

Nilinaw ng DPWH na hindi na itutuloy ang planong total reblocking, free Skyway use, at odd-even scheme. Mananatili naman ang number coding sa EDSA, habang tiniyak ng mga ahensya ang dagdag na Carousel buses at deployment ng bagong MRT-3 trains upang maibsan ang epekto ng rehabilitasyon sa mga motorista at commuter.