Ipinag-utos ng Regional Trial Court ng Mandaluyong sa Department of Foreign Affairs (DFA) na kanselahin ang mga passport nina dating PCSO general manager Royina Garma at dating PNP commissioner Edilberto Leonardo, kaugnay ng pagpatay kay Wesley Barayuga noong 2020.

Kasama rin sa utos ng korte na kanselahin ang mga passport nina Santie Mendoza, Nelson Mariano, at Jeremy Causapin, na pawang nahaharap sa murder at frustrated murder charges.

Ayon sa desisyon noong Oktubre 15, may “seryosong panganib” na tatakas ang mga akusado upang takasan ang paglilitis. Kasabay ng kanselasyon ng passport, naglabas din ang korte ng hold departure order (HDO) laban sa kanila.

Sa limang akusado, tanging sina Mendoza at Mariano lamang ang nasa kustodiya ng National Bureau of Investigation (NBI), habang nananatiling fugitives ang iba. Parehong not guilty ang plea nina Mendoza at Mariano, at itinakda ng korte ang pre-trial conference sa Nobyembre 12.

Matatandaang sina Garma at Leonardo ay tinukoy bilang mga umano’y mastermind sa pagpatay kay Barayuga, dating PCSO board secretary, na binaril sa Mandaluyong noong 2020.

Noong Setyembre, sinabi ni dating Justice Secretary Crispin Remulla na na-deport mula Estados Unidos si Garma matapos tanggihan ang kanyang asylum request. Nabatid din umano na nakatakda siyang magpatotoo sa International Criminal Court (ICC) laban sa dating Pangulong Rodrigo Duterte.

Nangako ang Quezon City government ng tulong sa pamilya ng tatlong batang nasawi sa sunog sa Barangay Sto. Domingo nitong Martes.

Ayon sa pahayag ng City Hall, sasagutin ng lungsod ang lahat ng gastusin — mula lamay hanggang cremation ng mga biktima. Magbibigay rin sila ng psychosocial support para matulungan ang pamilya sa pagbangon sa trahedya.

Bukod dito, makatatanggap din ng pinansyal na tulong at relief packages ang iba pang naapektuhan ng sunog. Plano rin ng lungsod na irekomenda ang mga biktima para maisama sa Integrated Disaster Shelter Assistance Program ng Department of Human Settlements and Urban Development upang matulungan silang muling makapagsimula.

Dagdag ng pamahalaang lungsod, patuloy nilang palalakasin ang kaligtasan at kahandaan ng komunidad laban sa sunog at iba pang sakuna.

“Hindi na natin maibabalik ang ating mga mahal sa buhay, pero sisiguruhin nating hindi na ito mauulit. Sama-sama nating poprotektahan ang bawat tahanan at pamilya sa Quezon City,” ayon sa QC government.

Isinumite ni Marikina 1st District Rep. Marcelino Teodoro ang kanyang counter-affidavit sa Department of Justice (DOJ) bilang tugon sa kasong rape at acts of lasciviousness na isinampa laban sa kanya ng dalawang babaeng pulis.

Kasabay nito, 28 saksi — kabilang ang ilang kapwa pulis ng mga nagsampa ng reklamo — ang naghain din ng kani-kanilang affidavit upang pabulaanan ang mga paratang laban sa kongresista.

Ang dalawang pulis na nagsampa ng kaso ay dati umanong close-in security ni Teodoro noong siya ay alkalde pa ng Marikina.

Dumating si Teodoro sa DOJ kasama ang kanyang asawa na si Marikina Mayor Marjorie Ann Teodoro at ang kanyang abogado na si Atty. Alma Mallonga.

Noong Lunes, nagsampa rin ang kongresista ng perjury case laban sa dalawang pulis sa Manila prosecutor’s office, at pinag-iisipan niyang magsampa pa ng reklamo sa Internal Affairs Service ng PNP laban sa kanila.