Matapos ang mahabang panahon ng pananahimik dahil sa kaniyang kalusugan, opisyal nang inanunsyo ng global megastar na si Celine Dion ang kaniyang pagbabalik sa pagtatanghal. Sa isang video na inilabas kasabay ng kaniyang ika-58 na kaarawan, sinabi ng singer na ito ang pinakamagandang regalo na natanggap niya dahil muli siyang makakasama ng kaniyang mga tagahanga.

Matatandaang pansamantalang huminto si Celine sa pagkanta matapos siyang ma-diagnose na may Stiff Person Syndrome, isang bihirang kondisyon na nakaapekto sa kaniyang pagkilos at boses. Ngunit dahil sa kaniyang determinasyon at pagbuti ng pakiramdam, nakatakda siyang magsagawa ng serye ng mga concert sa Paris simula ngayong Setyembre.

Bukod sa kaniyang pagbabalik-entablado, inaasahan ding maglalabas siya ng bagong kanta sa ilalim ng batikang kompositor na si Jean-Jacques Goldman. Para kay Celine, ang hakbang na ito ay patunay na hindi siya sumuko sa kabila ng mga pagsubok, at handa siyang muling magbigay ng inspirasyon sa pamamagitan ng kaniyang musika.

Muling nagningning ang talentong Pilipino sa buong mundo matapos makakuha ng Golden Buzzer ang singer na si Matty Juniosa sa sikat na reality show na Britain’s Got Talent. Sa kanyang audition, ipinamalas ng 27-anyos na Pinoy ang kanyang husay sa pagkanta ng Purple Rain ni Prince na nagpalingon at nagpatayo sa mga hurado at manonood.

Dahil sa kanyang emosyonal at makapigil-hiningang performance, hindi nag-atubili ang kilalang istriktong judge na si Simon Cowell na pindutin ang Golden Buzzer. Ayon kay Cowell, ito ang isa sa pinakamalakas na reaksyong natanggap nila mula sa madla sa buong season. Sa katunayan, sinabi pa ng music mogul sa kanyang social media na kung pwede lang ay dalawang Golden Buzzer ang ibinigay niya sa Pinoy singer.

Si Matty, na kasalukuyang nagtatrabaho bilang part-time waiter sa Glasgow, Scotland, ay hindi na bago sa kompetisyon dahil dati na siyang sumali sa Idol Philippines noong 2019. Sinabi niya na ang pagsali sa British talent show ay paraan niya upang patunayan sa sarili na hindi siya bigo sa larangan ng musika. Dahil sa kanyang pagkapanalo, direkta na siyang tutuloy sa live semi-finals ng paligsahan at hindi na kailangang dumaan sa iba pang audition rounds.

Nanatiling numero uno sa North American box office ang science fiction film na Project Hail Mary sa ikalawang sunod na linggo. Ang pelikulang pinagbibidahan ni Ryan Gosling ay kumita ng karagdagang $54.5 milyon o mahigit 3 bilyong piso sa ticket sales base sa pinakahuling pagtaya nitong Linggo.

Sa kwento ng pelikula, gumanap si Gosling bilang isang guro na naging astronaut na nagising sa loob ng isang spaceship. Wala siyang matandaan sa kanyang nakaraan, ngunit unti-unti niyang natuklasan na nasa balikat niya ang misyon na iligtas ang mundo mula sa panganib na dulot ng unti-unting pagdidilim ng araw. Ang pelikulang ito ay hango sa sikat na nobela ni Andy Weir, ang siya ring sumulat ng hit movie na The Martian.

Dahil sa ganda ng takbo nito sa mga sinehan, tinalo ng Project Hail Mary ang ibang mga pelikula tulad ng animated film na Hoppers mula sa Disney at Pixar, pati na ang horror movie na They Will Kill You. Ang tagumpay na ito ay itinuturing na isa sa pinakamalaking achievement para sa Amazon MGM ngayong taon dahil sa dami ng mga nanonood na humahanga sa visual effects at galing sa pag-arte ni Gosling. Sa ngayon, patuloy pa ring dumaragsa ang mga tao sa mga sinehan para masaksihan ang kapana-panabik na space adventure na ito.