Ginunita ang yumaong “Meteor Garden” star na si Barbie Hsu sa unang anibersaryo ng kanyang pagpanaw sa pag-unveil ng isang memorial statue na dinisenyo mismo ng kanyang asawa na si DJ Koo.

Pumanaw si Barbie, na mas kilala bilang Big S, noong Pebrero 2, 2025 sa edad na 48 dahil sa pneumonia matapos mahawaan ng influenza habang nasa biyahe sa Japan.

Inilantad ang estatwa sa Chin Pao San Cemetery sa Taiwan, kung saan siya nakalibing. Pinamagatang “Eternal Orbit of Hsi-Yuan” ang memorial, hango sa kanyang Chinese name.

Ayon sa artist na si Chen Dao-Lee, gawa ang instalasyon sa stainless steel at brass, may sukat na humigit-kumulang 72 square meters at taas na 330 sentimetro.

Dumalo rin sa unveiling ang ilan sa mga dating co-star ni Barbie sa “Meteor Garden” na sina Jerry Yan, Rainie Yang, at Vic Chou, bilang pakikiisa sa pag-alala sa minamahal na aktres.

Ipinahayag ni Senate President Vicente Sotto III ang kanyang pagkadismaya sa umano’y pro-China na paninindigan ng ilang senador, sa kabila ng paulit-ulit na agresyon ng China laban sa mga barko at tauhan ng Pilipinas sa West Philippine Sea.

Ito’y kaugnay ng pagharang sa Senate Resolution 256, na kumokondena sa umano’y online bullying ng Chinese embassy laban sa mga opisyal at senador na kritikal sa China. Ayon kay Sotto, may mga pahayag ng ilang mambabatas na tila pumapanig sa Beijing, dahilan para hindi niya sisihin ang publiko kung ganoon ang naging basa nila sa sitwasyon.

Sinabi naman ni Sen. Panfilo Lacson na posibleng umiwas ang ilan sa pagpirma dahil sa takot na lumala ang relasyon ng Pilipinas at China. Gayunman, giit niya, hindi katanggap-tanggap ang pananahimik lalo’t may mga Pilipinong nasaktan at hinaharass sa dagat.

Labinlimang senador ang pumirma sa resolusyon, ngunit hinarang ito ni Sen. Alan Peter Cayetano, na nanawagan ng pagpigil at pagdinig sa komite. Tutol dito sina Sotto at Lacson, na iginiit na sapat na ang isang simpleng resolusyon para ipahayag ang sentimyento ng Senado.

Samantala, iginiit ni Sen. Erwin Tulfo, na hahawak sa foreign relations committee, ang patakarang “friends to all, enemies to none,” at tinutulan ang panukalang ideklarang persona non grata ang opisyal ng Chinese embassy upang maiwasan ang ganting hakbang laban sa mga Pilipinong diplomat.

Pumanaw na sa edad na 71 ang Emmy-winning actress na si Catherine O’Hara, kilala bilang ina ni Kevin sa “Home Alone” at bilang si Moira Rose sa hit series na “Schitt’s Creek,” ayon sa kanyang management agency.

Kinumpirma ng kanyang manager ang balita ngunit walang ibinigay na detalye sa sanhi ng pagkamatay. Ayon sa ulat, isinugod si O’Hara sa ospital mula sa kanyang tahanan sa Los Angeles bago magbukang-liwayway.

Ipinanganak sa Toronto noong 1954, nagsimula ang kanyang karera sa comedy theater na Second City, kung saan nakatrabaho niya si Eugene Levy—na magiging matagal niyang collaborator. Sumikat siya sa mga pelikulang “Beetlejuice,” “The Nightmare Before Christmas,” at lalo na sa “Home Alone” (1990), na nagbigay sa kanya ng pandaigdigang kasikatan.

Sa bagong henerasyon, mas nakilala siya bilang si Moira Rose sa “Schitt’s Creek,” isang papel na nagpanalo sa kanya ng Emmy, Golden Globe, at SAG Award.

Nagpaabot ng pakikiramay ang mga kasamahan niya sa industriya, kabilang si Macaulay Culkin, at maging ang Punong Ministro ng Canada na si Mark Carney, na tinawag siyang isang alamat ng Canadian comedy.

Iniwan ni Catherine O’Hara ang isang pamana ng tawa at kahusayan sa mahigit limang dekada sa pelikula at telebisyon—isang bituin na hindi malilimutan.