Aabot sa 800 Pilipino runners, na pinangungunahan ng dating Olympian na si Mary Joy Tabal-Jimenez, ang lalahok sa EVA Air Marathon sa Oktubre 26 sa Taiwan. Suportado ang event ng The STAR at The Freeman bilang media partners.

Mas pinalaki pa ng Team Philippines ang delegasyon nito matapos maging ikalawa sa may pinakamalaking bilang ng kalahok noong nakaraang taon. Layunin ng marathon na hindi lang kilalanin ang elite runners kundi itaguyod din ang sports tourism at konseptong “race-cation” para sa buong pamilya.

Kasama ni Tabal—ang kauna-unahang Filipina marathoner sa Olympics—ang mga kilalang atleta tulad nina Artjoy Torregosa, Prince Joey Lee, Franklyn Ferdie Yee, at mga Cebu Marathon champion na Mark Mahinay at Michelle Mendoza. Tampok din ang 10-anyos na si Jibreel Rivera bilang pinakabatang Filipino participant, hudyat ng pag-usbong ng bagong henerasyon ng Pinoy runners.

Ayon kay Tabal, espesyal ang karerang ito dahil layon niyang maipakita ang kahalagahan ng running bilang aktibidad ng pamilya. Ibinahagi rin ng EVA Air Philippines GM na si Rick Hsieh na bukas ang Taiwan sa mga Pilipino at ang marathon ay pagkakataon upang pagsamahin ang pagtakbo, paglalakbay, at oras kasama ang pamilya.

Inaasahang 24,000 runners mula sa iba’t ibang bansa ang sasali sa mga kategoryang 42K, 21K, 10K at 3K, na dadaan sa mga iconic na lugar tulad ng Taipei 101 at Chiang Kai-Shek Memorial Hall. Magbubukas din ang EVA Air ng dagdag na flights mula Manila, Cebu at Clark para mas mapadali ang biyahe ng mga kalahok.

Gumawa ng kasaysayan ang Filipino Valorant player na si Patrick “PatMen” Mendoza matapos magtala ng record-high na 516 average combat score (ACS)—ang pinakamataas sa isang mapa sa buong Valorant Champions Tour (VCT).

Nagawa ito ni Mendoza sa unang mapa ng laban ng Global Esports kontra DetonatioN FocusMe (DFM) noong Pebrero 1, matapos kumolekta ng 32 kills, limang deaths at apat na assists. Gayunman, hindi nasundan ng panalo ang kanyang record performance dahil na-reverse sweep ang Global Esports at bumagsak sa lower round, na may huling tsansa para makapasok sa Valorant Masters Santiago.

Hindi rin pinalad ang iba pang koponang may Pinoy players sa VCT Pacific Kickoff. Tinalo ng DFM ang Team Secretnina JessieVash, kellyS, at coach Rbtx, 0-2. Isang buhay na lang ang natitira sa Team Secret sa torneo.

Natalo rin ang Paper Rex na may Filipino player na si Adrian “invy” Reyes, matapos yumuko sa RRQ ng Indonesia, 0-2, at bumaba sa middle round.

Maghaharap ang Team Secret at Zeta Division sa isang do-or-die match sa Pebrero 5, habang lalaban ang Global Esports sa Pebrero 7 kontra sa mananalo sa Gen.G vs VARREL. Samantala, sasabak ang Paper Rex laban sa T1 sa Pebrero 6 upang manatiling buhay sa torneo.

Pinatunayan ni Elena Rybakina na hindi kailangang maingay para maging mabagsik matapos niyang masungkit ang Australian Open title at pabagsakin ang dalawang top-ranked players sa mundo.

Tinalo ng 26-anyos na Kazakh ang No. 1 seed na si Aryna Sabalenka sa isang dikdikang final, 6-4, 4-6, 6-4, para makuha ang kanyang ikalawang Grand Slam—mahigit tatlong taon matapos ang Wimbledon triumph.

Kahit nahuli sa huling set, nanatiling kalmado si Rybakina at bumawi upang selyuhan ang panalo. Inamin niyang may halong matinding ginhawa ang kanyang tahimik na selebrasyon.

Mas lalo pang pinatibay ang kanyang dominasyon nang talunin din niya si Iga Swiatek sa quarterfinals at maitala ang 20 panalo sa huling 21 laban. Dahil dito, tinawag siya ng Australian media na “quiet assassin.”

Babalik si Rybakina sa World No. 3 at malinaw na nasa radar na niya ang World No. 1 ranking—kasabay ng hangaring magdagdag pa ng Grand Slam titles ngayong taon.