Patuloy na humahampas sa ilang bahagi ng Visayas ang Bagyong Tino (Kalmaegi) habang ito ay kumikilos pakanluran patungong Cebu, ayon sa PAGASA.

Sa ulat ng ahensya kaninang 2 a.m., Nobyembre 4, unang nag-landfall si Tino sa Silago, Southern Leyte, at bandang 5 a.m. ay huling namataan sa karagatan ng San Francisco, Cebu.

Taglay ng bagyo ang hanging umaabot sa 150 km/h malapit sa sentro at bugsong hanggang 205 km/h, habang ito ay kumikilos sa bilis na 25 km/h pakanluran. Ayon sa PAGASA, ang lakas ng hanging dala ni Tino ay umaabot hanggang 300 kilometro mula sa sentro.

Kasalukuyang nakataas ang Tropical Cyclone Wind Signal No. 4 sa ilang bahagi ng Leyte, Cebu, Bohol, Negros Oriental, Negros Occidental, Guimaras, Iloilo, at Antique.

Babala ng PAGASA, ang mga lugar na nasa ilalim ng Signal No. 4 ay maaaring makaranas ng mapaminsalang hangin na may bilis mula 118 hanggang 184 km/h, na banta sa buhay at ari-arian.

Pinapayuhan ang mga residente na manatili sa ligtas na lugar, sundin ang abiso ng lokal na pamahalaan, at mag-ingat sa posibleng pagbaha at pagguho ng lupa dala ng malakas na ulan at hangin.

Itinalaga ng UNESCO sina Quezon City at Dumaguete City bilang mga bagong miyembro ng Creative Cities Network nitong Oktubre 31, kasabay ng pagdiriwang ng World Cities Day. Bahagi ang dalawang lungsod sa 58 bagong kinilalang siyudad na nagpapakita ng pangako sa paggamit ng sining at malikhaing industriya bilang susi sa pangmatagalang pag-unlad.

Naging isa ang Quezon City sa mga bagong City of Film kasama ng Sao Paulo (Brazil), Giza (Egypt), at Ho Chi Minh (Vietnam) — kung saan parehong QC at Ho Chi Minh ang kauna-unahang Cities of Film sa Timog-Silangang Asya. Samantala, pinarangalan naman ang Dumaguete bilang City of Literature, kasunod ng Jakarta sa Indonesia na unang nakatanggap ng ganitong pagkilala noong 2021.

Ayon kay Mayor Joy Belmonte, ang bagong titulo bilang Film City ay pagkilala sa makulay na kasaysayan ng pelikula sa Quezon City — mula sa mga haligi ng industriya tulad nina Lino Brocka, Nora Aunor, at Fernando Poe Jr., hanggang sa mga bagong henerasyon ng manlilikha. Kaugnay nito, gaganapin ang 2025 QCinema International Film Festival mula Nobyembre 14 hanggang 21, na may temang “Film City.”

Inaprubahan ng Manila City Council ang mungkahing P25-bilyong badyet para sa 2026, kung saan 26 sa 38 konsehal ang bumoto pabor. Ayon kay Bise Alkalde Chi Atienza, ang pagpasa ng badyet ay tugon sa panawagan na ituon ang pondo sa mga pangunahing pangangailangan at serbisyong panlipunan, na siyang pangunahing layunin ng administrasyon ni Mayor Isko Moreno.

Ipinahayag naman ni District 3 Councilor Timothy Oliver Zarcal, na siyang pinuno ng Committee on Appropriations, na ang naturang badyet ay patunay ng pagiging bukas at tapat ng pamahalaang lungsod. Dagdag niya, layon nitong matugunan ang mga pangangailangan ng mga Manileño sa pabahay, kalusugan, edukasyon, trabaho, kaligtasan, at pagbangon ng ekonomiya.

Sa kasalukuyan, gumagamit din ang lungsod ng P25-bilyong badyet na inaprubahan noong nakaraang taon sa ilalim ng dating konseho—isang desisyong naging sanhi ng pagkakahati ng mga konsehal. Ayon sa mga konsehal na kaalyado ni Moreno, minadali umano ng administrasyong Lacuna-Pangan ang pagpasa ng 2025 budget nang walang sapat na deliberasyon.