Mukhang may bagong “happily ever after” na magaganap sa showbiz! Ayon kay veteran host at talent manager Ogie Diaz, nakatakdang ikasal si Carla Abellana sa kanyang non-showbiz partner bago matapos ang taon.

Sa pinakabagong episode ng Showbiz Update sa YouTube, ibinunyag ni Ogie na ayon sa kanyang source, ang mapapangasawa ni Carla ay isang chief medical officer ng pribadong ospital sa Quezon City. Dagdag pa niya, dati na raw naging magkaibigan at magkarelasyon ang dalawa noong high school pa lang.

“Guwapo raw ito in person, ha. At chinito!” pabirong sabi ni Ogie.

Noong Agosto, kinumpirma ni Carla na nakikipag-date na siyang muli. “I decided to try it… Yes, there’s a second date. We’ll see if there’s gonna be more,” sabi niya noon.

Matatandaang minsang ikinasal si Carla kay Tom Rodriguez, ngunit nauwi ito sa hiwalayan matapos lamang ang ilang buwan. Si Tom naman ay may anak na ngayon, si Korben, kasama rin ang kanyang non-showbiz partner.

Nilinaw ni Ogie na si Carla pa rin ang may karapatang magkumpirma o magbigay ng detalye tungkol sa umano’y nalalapit niyang kasal.

Sweetness overload talaga! Nag-viral ang mga litrato nina Janella Salvador at Klea Pineda matapos magpalitan ng mga nakakakilig na post sa X (dating Twitter).

Unang nag-upload si Janella ng mga larawan kasama sina Klea at Jasmine Curtis-Smith, ang mga co-stars niya sa Cinemalaya film na “Open Endings.” May caption pa siyang, “Ugh fine I’ll stop gatekeeping these photos.”

Hindi naman nagpahuli si Klea—nag-reply siya gamit ang sariling set ng sweet photos nila ni Janella, kung saan makikitang nagyakapan pa at nagbibiruan ng “cheek kisses.” Ang caption niya: “Sige na nga ako din.” Sagot ni Janella: “Ay sus, inunahan ako.”

Dahil dito, muling umingay ang mga tsismis tungkol sa kanila, lalo na’t dati nang naiuugnay si Janella sa breakup ni Klea at ng dating girlfriend nitong si Katrice Kierulf—isang bagay na itinanggi na ni Janella noon.

“Hindi po ako third party. Gusto ko lang linawin na wala akong kinalaman sa breakup,” pahayag ng aktres.

At nang tanungin tungkol sa estado nila ni Klea, simpleng sagot ni Janella:
“Kung ano’ng nakikita niyo ngayon, ‘yun na ‘yun. Nakikita niyo naman kung gaano ako kasaya.”

Nagbiro ang aktres na si Pinky Amador tungkol sa isyu ng fake news sa isang video na ipinost niya sa Instagram at Facebook. Sa clip, makikitang naglalakad siya papunta sa isang kiosk ng “Ka Tunying” at pabirong sinabi:

“Bibili sana ako ng fake news.”

Sa caption ng kanyang post, hinikayat niya ang publiko na maging mapanuri sa mga nababasa at huwag magpakalat ng maling impormasyon. Ginamit din niya ang mga hashtag na #Satire, #LabanSaFakeNews at #KurakotIkulong.

Ang “Ka Tunying” ay negosyo ni broadcaster Anthony Taberna na nagbebenta ng tinapay, kape, at pagkaing Pinoy. Kamakailan, napasama sa balita si Taberna matapos muling umingay ang dati niyang endorsement sa Stronghold Insurance Company Inc., na umano’y konektado sa kontrobersyal na contractor couple na sina Sarah at Curlee Discaya. Nilinaw ng kumpanya na wala silang direktang kinalaman sa kontrata ng mag-asawang Discaya sa Department of Public Works and Highways.

Bukod dito, naging usap-usapan din si Taberna matapos niyang sabihin sa kanyang vlog na may budget insertions si Sen. Risa Hontiveros para sa mga proyekto ng imprastraktura sa kasalukuyang panukalang badyet. Mariing itinanggi ni Hontiveros ang naturang paratang.