Isang malaking panalo ang nakuha ni Min Hee-jin, dating CEO ng ADOR, matapos utusan ng Seoul Central District Court ang K-pop giant na HYBE na bayaran siya ng 25.5 billion won (humigit-kumulang $17.7 milyon o halos P1 bilyon).

Nag-ugat ang halos dalawang taong legal na labanan noong Abril 2024, na umikot sa umano’y unilateral o isang panig na pagwawakas ng HYBE sa kanilang shareholders’ contract. Ayon sa korte, walang bisa ang naturang termination.

Ang kaso ay nadamay pa ang girl group na NewJeans, na nag-debut sa ilalim ng ADOR noong 2022. Ang ADOR ay subsidiary ng HYBE, na siyang namamahala rin sa global supergroup na BTS.

Sa pahayag, nagpasalamat si Min sa korte sa “makatarungang paghusga” matapos ang mahabang proseso. Aniya, nais na niyang tapusin ang “nakakapagod na alitan” sa pagitan niya at ng kumpanya. Siya ngayon ang CEO ng Oaak Records.

Samantala, inihayag ng HYBE na maghahain ito ng apela laban sa desisyon ng korte.

Nagkatuluyan na ang award-winning documentarist at GMA News reporter na si Mav Gonzales at Fil-Am actor na si Matthew Valeña matapos ang isang tahimik na kasal noong Setyembre sa US—at ngayon, inaasahan na rin nila ang kanilang unang anak.

Nag-umpisa ang kanilang kuwento sa dating app na Bumble, kung saan nag-match sila noong Marso. Mula roon, mabilis ang mga pangyayari: nagkita sila nang personal noong Abril, nag-engage noong Hunyo, at ikinasal sa Seattle pagdating ng Setyembre. Ayon sa mag-asawa, malinaw at tapat na usapan tungkol sa mga plano at values ang naging pundasyon ng kanilang relasyon.

Inamin ni Mav na siniguro muna niyang “real” si Matthew sa pamamagitan ng paghingi ng kanyang social media. Para kay Matthew naman, alam niya agad na si Mav na ang “the one,” dahil tugma ang direksyon at paninindigan nila sa buhay.

Matapos ang kasal, lumipat si Matthew sa Pilipinas para kay Mav, iwan ang kanyang acting career sa US. Bukas siyang gumawa ng mas maraming proyekto rito—kailangan lang daw munang hasain ang kanyang Tagalog.

Mula swipe right hanggang sa bagong yugto ng pagiging magulang, patunay sina Mav at Matthew na posible pa ring makahanap ng tunay na pag-ibig—kahit online nagsimula.

Ibinenta na ng pop icon na si Britney Spears ang karapatan sa kanyang music catalog, na kinabibilangan ng mga hit na “…Baby One More Time” at “Oops!…I Did It Again,” ayon sa ulat ng US media.

Tinatayang aabot sa $200 milyon o humigit-kumulang P11.6 bilyon ang halaga ng deal, base sa impormasyong inilabas ng celebrity site na TMZ. Ang mga karapatan ay binili umano ng Primary Wave, isang music publisher na may hawak ding mga obra nina Whitney Houston, Bob Marley, at Prince.

Kasama si Spears sa dumaraming listahan ng mga artist na nagbenta ng kanilang music rights, tulad nina Justin Bieber, Bruce Springsteen, Bob Dylan, Shakira, at KISS. Sa ganitong setup, kumikita ang may-ari ng karapatan sa bawat broadcast, bentahan ng album, at paggamit ng kanta sa ads at pelikula—isang kaakit-akit na long-term investment sa panahon ng streaming.

Sumikat si Spears noong late 1990s ngunit bihira na siyang maglabas ng bagong musika sa mga nakaraang taon. Noong 2021, tuluyan ding tinapos ng korte sa US ang 13-taong conservatorship na kumokontrol sa kanyang pananalapi—isang sistemang dati niyang tinawag na mapang-abuso.