Gumawa ng malaking upset si Alex Eala matapos patumbahin ang World No. 8 na si Jasmine Paolini, 6-1, 7-6(5), para umabante sa Round of 16 ng Dubai Tennis Championships noong Miyerkules (Manila time).

Sa harap ng masiglang Filipino crowd sa Center Court, pinakita ni Eala ang tibay ng loob lalo na sa dikdikan na second-set tiebreak. Matapos mawala ang 5-3 abante at mapasakamay ni Paolini ang 6-5 lead, nakabawi ang Pinay upang maitulak ang laban sa tiebreak at tuluyang maselyuhan ang panalo.

Ayon kay Eala, mataas ang tensyon sa ikalawang set kaya emosyonal ang tagumpay. Aniya, malaking bagay ang makasabay at matalo ang isang top-10 player at dating kampeon ng torneo.

Nasa ika-47 puwesto ngayon sa world rankings, dominado ni Eala ang unang set sa pamamagitan ng limang sunod na games. Hangad niyang maipagpatuloy ang magandang kampanya sa Middle East matapos umabot sa quarterfinals ng Abu Dhabi Open kamakailan.

Sa panalong ito, muling pinatunayan ni Eala na kaya niyang makipagsabayan sa pinakamahuhusay sa mundo.

Diretso na sa main draw ng WTA1000 Dubai Duty Free International Tennis Championships si Alex Eala matapos umakyat sa Top 40 ng rankings ng Women’s Tennis Association.

Dahil sa pag-angat niya sa world rankings, hindi na kailangang dumaan ni Eala sa qualifying round at agad siyang makakaharap ang ilan sa pinakamalalaking pangalan sa women’s tennis. Kabilang dito sina world No. 1 Aryna Sabalenka, No. 2 Iga Swiatek, at No. 3 Elena Rybakina, na kamakailan ay nagkampeon sa Australian Open.

Pangalawang torneo na ito ni Eala sa United Arab Emirates ngayong taon matapos ang impresibong pag-abot sa quarterfinals ng singles at semifinals ng doubles sa WTA500 Abu Dhabi Open. Ito rin ang ikalawa niyang WTA1000 event ngayong season matapos ang maagang exit sa Qatar Open.

Sa edad na 20, patuloy ang pag-angat ni Eala sa world stage at inaasahang muling susuportahan ng mga overseas Filipinos sa Dubai ang kanyang kampanya laban sa mga “titans” ng tennis.

Pinatunayan ng Cignal na hindi star power kundi chemistry at tiwala sa isa’t isa ang susi ng kanilang tagumpay matapos talunin ang Farm Fresh sa apat na set, 25-17, 26-24, 20-25, 30-28, sa PVL All-Filipino Conference sa MOA Arena.

Pinangunahan nina Vannie Gandler (25 puntos) at Erika Santos (15 puntos) ang Super Spikers, na umangat sa ikatlong sunod na panalo at nanatiling solo leader ng torneo. Ayon kay coach Shaq delos Santos, nanalo ang koponan dahil sa sipag at paniniwala sa sarili.

Para sa Farm Fresh, tumapos si Trisha Tubu na may 19 puntos at si Ces Molina na may 18, habang nag-ambag sina Royse Tubino (14) at Mylene Paat (7). Nagkaroon pa ng tsansa ang Foxies na itulak sa deciding set ang laban nang manguna sila ng 24-22 sa fourth set, ngunit nanaig ang composure ng Cignal sa huli.

Bumaba ang Farm Fresh sa 0-2, habang naghahanda naman ang Cignal sa isang inaabangang sagupaan kontra sa kapwa unbeaten na Nxled (2-0) sa Sabado sa Ynares Center, Antipolo.