Hindi prayoridad ni dating kongresista Zaldy Co ang magtestigo laban kay Pangulong Marcos sa posibleng impeachment proceedings, kahit pa iniuugnay niya ang Pangulo sa umano’y anomalya sa mga flood control projects. Ito ang pahayag ng kanyang abogado na si Ruy Rondain sa panayam sa One News.

Ayon kay Rondain, bagama’t mahalagang ma-authenticate ang mga pahayag ni Co para magamit sa anumang kaso, hindi ito ang pangunahing dahilan kung bakit inilabas ni Co ang video ng mga alegasyon. Maaari pa rin umanong magsilbing batayan ang mga ito para simulan ang imbestigasyon, kahit hindi pa sinumpaan.

Si Co ay may mga warrant of arrest mula sa Sandiganbayan at nananatiling nasa ibang bansa mula nang sumabog ang isyu noong nakaraang taon. Inamin niyang naging bahagi siya ng umano’y scheme, ngunit iginiit na wala siyang kinita, kaya’t tumatanggi siyang magbayad ng restitution.

Dating chairman ng House committee on appropriations at founder ng Sunwest Construction, si Co ay inakusahan ng paggamit ng posisyon para sa umano’y paglustay ng bilyong pondo ng gobyerno. Mariin namang sinabi ng kanyang abogado na gawa-gawa ang mga kaso at maaari siyang maabsuwelto, subalit non-bailable ang mga ito—kaya’t aniya, haharap si Co sa mahabang pagkakakulong habang nililitis kung siya’y uuwi ngayon.

Nagsagawa ng hiwalay na imbestigasyon ang National Police Commission (Napolcom) sa pagpatay sa policewoman na si Diane Marie Mollenido at sa kanyang walong taong gulang na anak, na nakatuon sa kanyang asawa na isa ring pulis.

Ayon sa Napolcom, hindi pa inaalis sa listahan ng person of interest si Senior M/Sgt. John Mollenido, lalo na dahil sa ilang kahina-hinalang kilos matapos ang krimen, kabilang ang mabilis na pagpapakremate sa mga labi ng mga biktima at ang umano’y kakulangan ng emosyon nang ipaalam sa kanya ang nangyari.

Nanatili siya sa restrictive custody sa Camp Bagong Diwa habang nagpapatuloy ang imbestigasyon. Ipinag-utos ni Napolcom Vice Chairman Rafael Vicente Calinisan ang masusing pagbusisi sa aspeto ng administratibong pananagutan at tiniyak na magiging makatarungan at walang pagtatakip ang imbestigasyon.

Samantala, itinuro ng pulisya bilang mga utak sa krimen ang mag-asawang Pia Katrina at Christian Panganiban, kasama ang ilan pang kasabwat na naaresto na rin. Kumpiyansa ang PNP na matibay ang ebidensiya laban sa kanila, sa kabila ng mga alegasyon ng pananakit at pang-aabuso sa kustodiya.

Patuloy ang imbestigasyon habang sinisilip din ng NCRPO ang posibilidad na may iba pang biktima ang pangunahing suspek, batay sa mga naunang reklamo laban dito.

Lumagda sa kasunduan ang Department of Human Settlements and Urban Development (DHSUD) at ang Pamahalaang Lungsod ng Quezon City para sa mga rental housing project na magbibigay ng ligtas at disenteng tirahan sa mga informal settler families.

Sa ilalim ng mga kasunduan, magtatayo ng medium-rise buildings sa Barangay Sauyo at Barangay Bagong Silangan, mga lugar na tinukoy ng QC bilang angkop sa rental housing sa ilalim ng Pambansang Pabahay para sa Pilipino (4PH) Program. Tinatayang 2,900 katao na nakatira sa danger zones at tabing-ilog ang makikinabang.

Ayon sa DHSUD, pinapinal na lamang ang mga detalye ng proyekto na bunga ng serye ng pagpupulong sa pagitan ni DHSUD Secretary Jose Aliling at QC Mayor Joy Belmonte. Buong-suporta si Belmonte sa rental housing modality, na aniya’y praktikal at makataong solusyon para sa mga pamilyang hindi pa kayang magkaroon ng sariling bahay.

Sa pangunguna ng QC, pinapalawak ang abot ng 4PH Program—mula pagmamay-ari hanggang abordable na paupahan—para mas maraming pamilya ang magkaroon ng maayos at ligtas na tahanan.