Mariing itinanggi ni Ellen Adarna ang pahayag na maituturing na “good provider” ang kanyang estranged husband na si Derek Ramsay para sa kanilang anak na si Liana.

Sa serye ng Instagram stories, tinawag ni Ellen na “misleading at unfair” ang mga pahayag ng showbiz columnist na si Cristy Fermin. Nilinaw niyang mas maaga pa lamang ngayong taon ay sinabi na niya sa kampo ni Derek na kung magbibigay ito ng sustento, hindi ito magkakaroon ng oras kasama ang bata.

Ayon kay Ellen, kamakailan lamang nagbigay si Derek ng credit card na may P50,000 limit, ngunit aniya’y kalahati pa lamang ito ng kabuuang gastusin para sa kanilang anak. Iginiit din niyang hindi umano nag-ambag si Derek at ang ina nito sa bayad sa kanyang household staff mula nang ikasal sila noong 2021, maliban sa isang yaya ni Liana.

Dagdag pa ng aktres, apat na buwan umanong walang naibigay na bahagi si Derek bago niya ito kinausap. Para kay Ellen, ang tunay na provider ay hindi na kailangang paalalahanan o tawagin pa sa publiko bago kumilos.

Sa gitna ng isyu, nabanggit din ni Ellen ang dati niyang partner na si John Lloyd Cruz. Aniya, kahit P20,000 lamang kada buwan ang ibinibigay noon para sa kanilang anak na si Elias, kusa umano itong nagdoble ng suporta at hindi na kailangang paalalahanan. Hiniling din niya sa publiko na huwag nang idamay si John Lloyd at igalang ang maayos nilang co-parenting setup.

Patuloy ang palitan ng pahayag sa social media, ngunit malinaw ang paninindigan ni Ellen: hindi sapat ang imahe o salita lamang para matawag na responsableng magulang.

Muling pinatunayan ni Taylor Swift ang kanyang dominasyon sa global music scene matapos siyang tanghaling best-selling global artist ng 2025, ayon sa International Federation of the Phonographic Industry (IFPI). Ikaapat na sunod na taon na niya itong napanalunan at ikaanim sa kabuuan.

Lalong umarangkada ang tagumpay ng 36-anyos na pop star dahil sa paglabas ng kanyang ika-12 album na The Life of a Showgirl noong Oktubre, na nagtakda ng ilang streaming records. Nakatulong din ang docuseries tungkol sa kanyang record-breaking na The Eras Tour upang palawakin pa ang kanyang global reach.

Ayon sa IFPI, umabot sa pambihirang antas ang worldwide engagement ni Swift sa streaming, digital downloads, at physical sales. Sa nakalipas na 10 taon, kapantay na raw ng kanyang anim na panalo ang pinagsamang bilang ng lahat ng iba pang artist na tumanggap ng parehong parangal.

Pumangalawa sa ranggo ang K-pop group na Stray Kids—ang pinakamataas nilang pwesto at ikatlong sunod na taon sa global top five. Nasa ikalima naman si Bad Bunny, na ika-anim na sunod na taon nang nasa talaan.

Samantala, unang beses nakapasok sa ranking si Tyler, The Creator sa ika-12 pwesto, habang sumunod sa kanya ang Japanese rock band na Mrs. Green Apple matapos ang tagumpay ng kanilang anniversary album na “10.”

Isang pag-amin ang ginawa ng internet personality na si Jack Argota, na kilala bilang “Sir Jack Argota” sa Facebook, kaugnay ng kumalat na umano’y medical certificate ni Pangulong Ferdinand Marcos Jr. Inamin niya na peke ang dokumentong kanyang ibinahagi online.

Humaharap si Argota sa imbestigasyon ng National Bureau of Investigation (NBI) matapos siyang ma-subpoena dahil sa naturang post noong Enero. Ayon sa kanya, natutunan niyang hindi dapat pairalin ang bugso ng damdamin at mas mabuting tiyaking may katotohanan ang isang impormasyon bago ito ibahagi.

Nang tanungin tungkol sa kanyang motibo, sinabi niyang ginawa niya ito upang makisabay sa uso at para sa “engagement” sa social media. Aniya, inakala niyang totoo ang dokumento dahil marami na rin ang nagpo-post nito kaya nakisabay na lamang siya. Sa kabila nito, sinabi rin niyang wala siyang pagsisisi sa kanyang ginawa.

Ang pekeng medical certificate ay kumalat matapos isapubliko na na-diagnose si Pangulong Marcos ng diverticulitis noong Enero 2026 dahil sa pananakit ng tiyan.

Samantala, naghain na rin ang NBI ng cyberlibel complaints laban kina Jay Sonza at Jeffrey Celiz kaugnay ng pagkalat ng maling medical records ng Pangulo.