Umani ng batikos online ang isang lalaki matapos magsuot ng Philippine National Police (PNP) uniform bilang Halloween costume, na itinuturing ng mga opisyal bilang insulto sa institusyon.

Kinilala ang lalaki bilang Daryll Isidro, na makikita sa isang viral na larawan na naka-sleeveless na PNP uniform sa isang Halloween party. Dahil dito, agad na kinondena ng PNP ang insidente at nagsagawa ng imbestigasyon.

Humingi ng paumanhin si Isidro sa pamamagitan ng isang pahayag sa Facebook (na kalauna’y binura), kung saan sinabi niyang wala siyang intensyong manlinlang o bastusin ang hanay ng pulisya. “Nais ko pong humingi ng taos-pusong paumanhin sa lahat ng pulis at sa institusyon. Hindi ko po sinasadyang makasakit, at inaako ko ang aking pagkakamali,” aniya.

Naglabas ng show-cause order si Napolcom Commissioner Rafael Calinisan, ngunit matapos ang paliwanag ni Isidro, napagpasyahang hindi na siya kakasuhan.

Samantala, binigyang-diin ni Acting PNP Chief Lt. Gen. Jose Melencio Nartatez Jr. na bawal sa ilalim ng Article 179 ng Revised Penal Code ang paggamit ng opisyal na uniporme nang walang awtorisasyon.

“Our uniform symbolizes bravery and public trust,” ani Nartatez. “Ang paggamit nito bilang costume ay pambabastos sa sakripisyo ng mga tunay na pulis.”

Bagaman tinanggap ang paghingi ng tawad ni Isidro, nanawagan ang PNP sa publiko na igalang ang uniporme at ang kahulugang taglay nito.

Kasunod ng pagkamatay ng content creator na si Emman Atienza, inihain sa Senado ang isang panukalang batas na layong labanan ang online hate, cyberbullying, at digital harassment.

Ang panukalang ito, na tatawaging “Emman Atienza Bill” (Senate Bill No. 1474), ay inihain ni Senate Deputy Majority Leader JV Ejercito. Layunin nitong palawakin ang kasalukuyang mga batas laban sa cybercrime at bullying upang maparusahan ang mga kilos tulad ng online hate speech, cyberstalking, at pagpapakalat ng pribadong impormasyon nang walang pahintulot.

Ayon kay Ejercito, napapanahon na ang mas mahigpit na batas laban sa digital abuse, lalo na’t dumarami ang biktima, kabilang ang mga kabataan. “Ang social media ay dapat maging plataporma ng katotohanan, hindi ng paninira o karahasan,” aniya.

Sa ilalim ng panukala, obligado ang mga digital platform na tanggalin o i-block ang mapanirang content sa loob ng 24 oras matapos matanggap ang beripikadong reklamo o kautusan ng korte. Maaari rin silang mag-suspend o mag-ban ng mga lumalabag at obligadong i-preserba ang digital evidence para sa imbestigasyon.

Ang panukalang batas ay inaalay bilang pagpupugay kay Emman Atienza, na naging biktima ng matinding online bullying.

Ayon sa Pasig City Prosecutor’s Office, walang basehan ang paratang laban kay environmental activist Jonila Castro na umano’y nanguna o nag-organisa sa protesta noong Setyembre 4 sa tanggapan ng St. Gerrard Construction sa Pasig. Ipinunto rin ng resolusyon na walang sapat na ebidensya na nagdulot ng kaguluhan o banta sa kaayusan ang naturang pagtitipon. Si Castro, tagapagsalita ng grupong Kalikasan, ay inakusahan ng pulisya ng paglabag sa Public Assembly Act dahil sa umano’y pagdalo sa rally na walang permit.

Ang protesta ay isinagawa laban sa St. Gerrard Construction, na pinamumunuan nina Sarah at Curlee Discaya, dahil sa umano’y iregular na proyekto sa flood control. Ayon sa mga ulat, kabilang ang mga kompanya ng Discaya sa 15 kontratista na nakakuha ng halos ₱100 bilyon—katumbas ng 20 porsiyento ng pambansang pondo para sa flood management sa loob ng tatlong taon. Sa naturang mga proyekto, ilang opisyal ng gobyerno, kontratista, at inhenyero ang nasangkot sa umano’y korapsyon at kickbacks.

Inirekomenda ng Independent Commission for Infrastructure (ICI) ang pagsasampa ng kasong plunder, bribery, graft at corruption laban kina Senador Joel Villanueva, Jinggoy Estrada, dating kongresista Zaldy Co, dating mambabatas ng Caloocan Mitch Cajayon-Uy, dating undersecretary Roberto Bernardo, at dating audit commissioner Mario Lipana. Aabot sa 15 opisyal ng gobyerno ang unang kakasuhan ng Office of the Ombudsman sa Sandiganbayan bago mag-Nobyembre 25. Samantala, natapos na rin ng ICI at iba pang ahensya ng gobyerno ang balangkas para mabawi ang mga ari-ariang nakuha mula sa pondo ng flood contro