Isang pag-amin ang ginawa ng internet personality na si Jack Argota, na kilala bilang “Sir Jack Argota” sa Facebook, kaugnay ng kumalat na umano’y medical certificate ni Pangulong Ferdinand Marcos Jr. Inamin niya na peke ang dokumentong kanyang ibinahagi online.

Humaharap si Argota sa imbestigasyon ng National Bureau of Investigation (NBI) matapos siyang ma-subpoena dahil sa naturang post noong Enero. Ayon sa kanya, natutunan niyang hindi dapat pairalin ang bugso ng damdamin at mas mabuting tiyaking may katotohanan ang isang impormasyon bago ito ibahagi.

Nang tanungin tungkol sa kanyang motibo, sinabi niyang ginawa niya ito upang makisabay sa uso at para sa “engagement” sa social media. Aniya, inakala niyang totoo ang dokumento dahil marami na rin ang nagpo-post nito kaya nakisabay na lamang siya. Sa kabila nito, sinabi rin niyang wala siyang pagsisisi sa kanyang ginawa.

Ang pekeng medical certificate ay kumalat matapos isapubliko na na-diagnose si Pangulong Marcos ng diverticulitis noong Enero 2026 dahil sa pananakit ng tiyan.

Samantala, naghain na rin ang NBI ng cyberlibel complaints laban kina Jay Sonza at Jeffrey Celiz kaugnay ng pagkalat ng maling medical records ng Pangulo.

Ipinagtanggol ng dating aktor na si Alvin Aragon ang kanyang asawang si Izzy Trazona laban sa mga batikos kaugnay ng umano’y hindi pagtanggap nito sa kanilang anak na si Sofia, na isa nang transwoman.

Sa panayam sa DWAR, sinabi ni Aragon na maraming bumabatikos kay Izzy dahil sa paninindigan nito tungkol sa homosexuality. Iginiit niya na ang kanilang pananaw ay nakabatay sa mga aral ng Bibliya, kabilang ang kuwento ng Sodom at Gomorrah, at naniniwala siyang tungkulin ng magulang na ituro sa anak ang sa tingin nila ay tama ayon sa kanilang pananampalataya.

Samantala, sa social media platform na X, ibinahagi ni Sofia na hindi na sila nagkikita ng kanyang ina at aminado siyang may takot siya sa posibleng maging reaksyon nito sa kanyang pagharap bilang isang transwoman. Aniya, ang nais lamang niya ay pagtanggap at validation.

Sa kabila ng isyu, nagkaroon pa rin umano ng komunikasyon ang mag-ina nang batiin ni Sofia si Izzy sa muling pag-akyat nito sa entablado kasama ang SexBomb Girls sa kanilang reunion show sa Mall of Asia Arena noong Pebrero 7.

Patuloy ang usapin sa social media hinggil sa pananampalataya, pagtanggap, at ugnayan ng pamilya.

Mula sa loob ng Bahay ni Kuya, sabay-sabay na haharap ang mga housemates ng “Pinoy Big Brother” collab edition sa bagong hamon—ang primetime series na “The Secrets of Hotel 88.” Tampok dito sina Mika Salamanca, Brent Manalo, AZ Martinez, Ralph De Leon, River Joseph, Klarisse De Guzman, Esnyr Ranollo, Xyriel Manabat, Josh Ford, Kira Balinger, Dustin Yu, Bianca De Vera at Will Ashley.

Ang serye, na proyekto ng Star Creatives at kolaborasyon ng GMA Network at ABS-CBN, ay inilarawang “genre-bending” — pinagsamang family drama, romance, suspense-thriller at kaunting aksyon.

Ayon kay direktor Henry King Quitain, bawat karakter ay may itinatagong lihim na unti-unting mabubunyag habang humaharap sila sa mga hindi natatapos na alitan at matitinding komprontasyon. Layunin ng palabas na magbigay ng kakaibang timpla sa primetime viewing at ipakita ang bagong mukha ng mga dating housemates bilang seryosong aktor.

Bago magsimula ang taping, dumaan ang cast sa acting workshops at paghahanda para mas mapalalim ang kanilang mga karakter. Pinuri rin ang produksyon sa pagbibigay-priyoridad sa kaligtasan ng mga artista, lalo na sa mga stunt at action scenes.

Hindi man hango sa totoong pangyayari, ayon sa creative team, ang serye ay dinisenyo upang bigyan ang mga manonood ng “summer to remember” — isang kwentong puno ng pakikipagsapalaran, kilig, tensyon at matibay na samahan na tila isang pamilya.