Napansin ng mga Pinoy viewers ang ilang pamilyar na tanawin sa Pilipinas matapos lumabas sa K-drama na Boyfriend on Demand ang ilang lokasyon sa Cebu, pati na rin ang isang lokal na rum.

Sa unang episode ng serye na pinagbibidahan ni Jisoo kasama sina Seo In-guk at Lee Soo-hyuk, makikita ang isang beach scene na kinunan sa Shangri-La Mactan, Cebu. Sa eksena, iniimagine ng karakter ni Jisoo na si Soo Mirae ang kanyang “best summer” sa Pilipinas habang nasa tabing-dagat, kung saan makikita rin ang tourism slogan na “Love the Philippines.”

Kinumpirma naman ng Department of Tourism na sa naturang resort kinunan ang eksena at may iba pang magagandang tanawin mula sa Cebu na lalabas sa mga susunod na episode.

Sa Episode 6 naman, tampok din ang Bluewater Maribago Beach Resort bilang isa pang tropical backdrop ng serye. Ibinahagi ng resort ang ilang screenshots ng eksena kung saan makikita ang mga South Korean stars sa kanilang lugar.

Bukod sa mga tanawin, napansin din ng fans sa isang episode na umiinom ang karakter ni Seo In-guk ng isang sikat na rum na gawa sa Pilipinas—na lalo pang nagpasigla sa “Uy, Pilipinas!” moment ng mga manonood online.

Naalala rin ng fans na nakita si Jisoo na nagfi-film sa Cebu noong Pebrero ng nakaraang taon, bago siya bumalik sa bansa para sa Manila stop ng kanyang solo fan tour na “Lights Love Action.”

Kinumpirma ng Formula One champion na si Lewis Hamilton na ginagawa na ang sequel ng matagumpay na pelikulang “F1: The Movie,” na pinagbidahan ni Brad Pitt.

Ayon kay Hamilton, nagsisimula na ang paggawa ng script para sa susunod na pelikula. Aniya, nagkaroon na sila ng unang pagpupulong kasama ang producer na si Jerry Bruckheimer at direktor na si Joseph Kosinski upang talakayin ang posibleng direksyon ng kuwento.

Ipinalabas ang unang “F1: The Movie” noong nakaraang taon at tampok dito sina Brad Pitt at Damson Idris. Umikot ang kuwento sa isang beteranong Formula One driver na bumalik sa karera upang tulungan ang isang nahihirapang team, na pinamumunuan ng karakter ni Javier Bardem.

Malaki ang naging tagumpay ng pelikula matapos kumita ng mahigit $630 milyon sa buong mundo. Ayon kay Hamilton, marami pa rin siyang natatanggap na mensahe mula sa mga manonood na ngayon pa lang nadidiskubre ang mundo ng Formula One dahil sa pelikula.

Bagama’t bahagi siya ng production team, sinabi ni Hamilton na mas gusto niyang manatili sa likod ng kamera kaysa umarte sa pelikula. Dagdag pa niya, sisiguraduhin nilang mabuti ang paggawa ng sequel upang mapantayan o mahigitan ang tagumpay ng unang pelikula.

Nag-enjoy sa isang beach getaway sa Amanpulo, Palawan sina Ellen Adarna kasama ang kanyang mga anak na sina Elias at Lili, pati ang dating partner na si John Lloyd Cruz at kasalukuyang girlfriend nito na si Isabel Santos.

Sa mga Instagram story ni Ellen, ibinahagi niya ang ilang sandali ng kanilang bakasyon sa luxury private island. Makikita sa mga video ang mga bata na masayang naglalaro sa puting buhangin at nag-oobserba ng iba’t ibang sea creatures tulad ng mga pawikan.

Nag-post din si Ellen ng selfie habang si Isabel naman ang pansamantalang nagbabantay sa mga bata. Sa isa pang video, makikita si Isabel na naglalakad kasama ang mga anak ni Ellen.

Samantala, ibinahagi rin ni Ellen ang video ng bonding moment nina Elias at ng ama nitong si John Lloyd habang naghahanap ng mga alimango sa tabing-dagat.

Sa isang nakaraang panayam, sinabi ni Ellen na maayos ang relasyon nila ni John Lloyd bilang co-parents. Ayon sa kanya, kusa pa raw nag-alok ng tulong ang aktor nang lumipat sila ng bahay.

“Mas okay kami ngayon bilang co-parents. Kapag may kailangan kami, kusa siyang nag-aalok ng tulong,” ani Ellen, na nagpasalamat sa pagiging supportive ni John Lloyd sa kanilang anak.