Isang walong taong gulang na lalaki ang nasawi matapos umanong saksakin ng kanyang kapitbahay sa Barangay Santiago II, San Pablo, Laguna, ayon sa pulisya.

Base sa ulat, nagtamo ang bata ng mga sugat sa tainga, leeg, at tiyan, habang naputol din ang isa niyang kamay na pinaniniwalaang ginamit niya upang ipagtanggol ang sarili.

Iniimbestigahan na ng Philippine National Police ang isang kapitbahay bilang person of interest sa insidente. Tinitingnan din ng mga awtoridad ang anggulong maaaring may kinalaman ang krimen sa isang isyu ng pambu-bully na kinasangkutan umano ng biktima at anak ng suspek.

Nanawagan ang pamilya ng bata ng hustisya at hinikayat ang sinumang may impormasyon o nakasaksi sa pangyayari na makipag-ugnayan sa mga awtoridad habang nagpapatuloy ang imbestigasyon.

Mariing itinanggi ng Bureau of Customs (BOC) at Independent Commission for Infrastructure (ICI) ang paratang na sapilitang kinuha ang 34 luxury vehicles na iniuugnay kay dating kongresista Elizaldy “Zaldy” Co.

Ayon kay ICI special adviser Rodolfo Azurin, hindi umano kinuha ng mga awtoridad ang mga susi ng mga sasakyan, taliwas sa pahayag ng abogado ni Co na si Ruy Rondain. Giit pa niya, walang saysay ang alegasyong may isang taong may hawak ng 34 susi.

Ipinaliwanag ng BOC na walo sa siyam na luxury vehicles na nakarehistro kay Co, sa kanyang asawa at sa Sunwest Inc. ang nasamsam sa isang condominium sa BGC, Taguig noong Enero 8 dahil sa umano’y paglabag sa importation at hindi nabayarang buwis.

Gayunman, sinabi ng ICI na may impormasyon silang tumuturo sa 15 sasakyan pa lamang, kaya’t nagtaka sila sa sinasabing 34 units. Dahil dito, sinabi ni Azurin na susuriin ng ICI ang posibilidad ng karagdagang sasakyan na hindi saklaw ng kasalukuyang search warrant.

Ayon naman sa BOC, naka-body cam ang buong operasyon at may kopya ng search warrant ang mga abogado ng may-ari ng sasakyan. Patunay umano ito na maayos at legal ang isinagawang pagsamsam.

Si Co ay kabilang sa mga pangunahing personalidad na iniimbestigahan sa anomalous flood control projects at kinasuhan ng graft ng Sandiganbayan noong Disyembre 2025.

Matapos makaiwas sa limang magkakasunod na buy-bust operations, tuluyan nang nadakip ng Philippine Drug Enforcement Agency (PDEA-12) ang isang shabu at marijuana peddler sa Koronadal City noong Enero 9.

Ayon sa mga opisyal, ang 38-anyos na suspek ay naaresto matapos magbenta ng isang sachet ng shabu sa mga operatiba sa isinagawang entrapment operation sa Barangay GPS. Agad siyang dinakip sa tulong ng Police Regional Office 12.

Ibinunyag ni PDEA-12 Director Charlene Magdurulang na naging posible ang operasyon dahil sa impormasyong ibinigay ng mga kamag-anak ng suspek at ng mga opisyal ng barangay, na matagal nang nakaaalam sa ilegal nitong gawain sa mga liblib na lugar ng Koronadal at karatig-bayan sa South Cotabato.

Nagpasalamat ang PDEA sa mga lokal na opisyal at confidential informants na tumulong sa matagumpay na operasyon. Nasa kustodiya na ngayon ang suspek at haharap sa mga kasong paglabag sa Comprehensive Dangerous Drugs Act of 2002