Sinimulan na ng International Criminal Court ang confirmation of charges hearing laban kay dating pangulong Rodrigo Duterte kaugnay ng kasong crimes against humanity na may kinalaman sa war on drugs.

Bagama’t sentro ng pagdinig ang kanyang kaso, hindi personal o virtual na haharap si Duterte matapos payagan ng Pre-Trial Chamber I ang kanyang kahilingang hindi dumalo. Mananatili siya sa ICC Detention Center sa Scheveningen, The Hague, kung saan siya nakapiit mula nang maaresto noong Marso 2025.

Sa pagdinig, tatalakayin kung may sapat na ebidensiya upang ituloy ang kaso sa full trial. Kinakatawan si Duterte ng kanyang defense team na pinamumunuan ni Nicholas Kaufman, habang higit 500 biktima ang pinayagang lumahok sa proseso. Ang pagdinig ay tatagal ng apat na araw at hahatiin sa iba’t ibang sesyon para sa prosekusyon, depensa at mga kinatawan ng mga biktima.

Pagkatapos ng hearing, may 60 araw ang mga hukom—pinamumunuan ni Judge Iulia Antonella Motoc—upang magpasya kung kukumpirmahin ang mga kaso, ibabasura ang mga ito, o hihingi ng dagdag na ebidensiya.

Kasabay nito, inaasahan ang magkahiwalay na pagtitipon ng mga biktima ng drug war at mga tagasuporta ni Duterte sa Pilipinas at sa labas ng ICC headquarters. Sa Quezon City, magsasagawa ng “Justice Watch” ang mga pamilya ng biktima, habang may motorcade at rally naman ang ilang supporter ng dating pangulo.

Sa Senado, nagpahayag ng suporta si Panfilo Lacson sa panukalang resolusyon na nagsasabing dapat munang dumaan sa lokal na korte ang anumang warrant mula sa internasyonal na tribunal bago ito ipatupad sa bansa.

Ang confirmation hearing ang magsisilbing unang malawakang pagtalakay sa ebidensiya laban kay Duterte sa bukas na pagdinig—isang mahalagang hakbang bago tuluyang magpasya kung haharap siya sa paglilitis.

Iginiit ni Harry Roque na wala at hindi umano matutuloy ang hinihiling na Interpol red notice laban sa kanya ng pamahalaan ng Pilipinas.

Nahaharap si Roque sa warrant of arrest kaugnay ng kasong qualified trafficking. Gayunman, sinabi niyang tinanggap na ng Interpol ang kanyang petisyon para ma-delist, batay sa kanyang nakabinbing asylum application sa European Union. Hiningi rin umano sa kanya ang English translations ng mga dokumentong magpapatunay ng kanyang asylum claim.

Sa kasalukuyan, wala ang kanyang pangalan sa listahan ng red notices sa website ng Interpol. Nasa Austria si Roque habang pinoproseso ang kanyang asylum application at iginiit niyang valid pa ang kanyang pasaporte dahil may nakabinbing motion for reconsideration.

Matatandaang noong Nobyembre, inanunsyo ng Department of Foreign Affairs na kinansela ng isang korte sa Pasig ang kanyang pasaporte.

Pinaninindigan ni Roque na siya ay biktima ng unjust prosecution. Ang mga kasong isinampa laban sa kanya ay may kaugnayan sa umano’y pagkakasangkot niya sa ilegal na operasyon ng isang Philippine offshore gaming operator sa Pampanga.

Inihayag ng North Korea ang bago nitong 600-millimeter multiple launch rocket system na kayang maglunsad ng nuclear warheads, ayon sa state media. Personal na pinangunahan ni Kim Jong Un ang unveiling ng armas at tinawag itong “natatangi sa mundo” at angkop para sa “strategic mission,” na karaniwang tumutukoy sa paggamit ng sandatang nukleyar.

Ayon sa ulat ng Korean Central News Agency, iginiit ni Kim na para ito sa “deterrence” laban sa mga kaaway, bagama’t hindi niya tinukoy kung sino. Matagal nang pangunahing katunggali ng Pyongyang ang South Korea, lalo’t nananatiling teknikal na nasa estado ng digmaan ang dalawang bansa.

Sinasabing maaaring gamitin ang bagong sistema laban sa South Korea, lalo’t wala pang 50 kilometro ang layo ng Seoul mula sa hangganan ng dalawang Korea. Matagal nang bahagi ng estratehiya ng North Korea ang malawakang artillery strikes sakaling sumiklab ang sigalot.

Sa mga nakaraang taon, pinaigting ng Pyongyang ang missile testing upang palakasin ang precision strike capabilities at hamunin ang impluwensiya ng Estados Unidos at South Korea. May mga analyst ding nagsasabing maaari nitong subukin ang mga armas bago i-export sa Russia.

Samantala, nagpahayag ng pasasalamat ang kapatid ni Kim na si Kim Yo Jong matapos aminin ng South Korea ang umano’y pagpasok ng isang surveillance drone sa himpapawid ng North. Nauna nang nagpahayag ng “deep regret” si Chung Dong-young kaugnay ng insidente.

Nakatakdang idaos ng North Korea ang isang mahalagang party congress sa unang bahagi ng 2026, kung saan inaasahang tatalakayin ang mga usaping pang-ekonomiya at militar.