Inihayag ng North Korea ang bago nitong 600-millimeter multiple launch rocket system na kayang maglunsad ng nuclear warheads, ayon sa state media. Personal na pinangunahan ni Kim Jong Un ang unveiling ng armas at tinawag itong “natatangi sa mundo” at angkop para sa “strategic mission,” na karaniwang tumutukoy sa paggamit ng sandatang nukleyar.

Ayon sa ulat ng Korean Central News Agency, iginiit ni Kim na para ito sa “deterrence” laban sa mga kaaway, bagama’t hindi niya tinukoy kung sino. Matagal nang pangunahing katunggali ng Pyongyang ang South Korea, lalo’t nananatiling teknikal na nasa estado ng digmaan ang dalawang bansa.

Sinasabing maaaring gamitin ang bagong sistema laban sa South Korea, lalo’t wala pang 50 kilometro ang layo ng Seoul mula sa hangganan ng dalawang Korea. Matagal nang bahagi ng estratehiya ng North Korea ang malawakang artillery strikes sakaling sumiklab ang sigalot.

Sa mga nakaraang taon, pinaigting ng Pyongyang ang missile testing upang palakasin ang precision strike capabilities at hamunin ang impluwensiya ng Estados Unidos at South Korea. May mga analyst ding nagsasabing maaari nitong subukin ang mga armas bago i-export sa Russia.

Samantala, nagpahayag ng pasasalamat ang kapatid ni Kim na si Kim Yo Jong matapos aminin ng South Korea ang umano’y pagpasok ng isang surveillance drone sa himpapawid ng North. Nauna nang nagpahayag ng “deep regret” si Chung Dong-young kaugnay ng insidente.

Nakatakdang idaos ng North Korea ang isang mahalagang party congress sa unang bahagi ng 2026, kung saan inaasahang tatalakayin ang mga usaping pang-ekonomiya at militar.

Patuloy na nakakatakas sa awtoridad ang negosyanteng si Charlie Atong Ang sa kabila ng 10 isinagawang raid sa mga pinaghihinalaang pinagtataguan nito, ayon kay Jonvic Remulla.

Sinabi ni Remulla na negatibo ang lahat ng operasyon ng mga tracker team ng Philippine National Police at National Bureau of Investigation. Itinaas na rin sa P20 milyon ang pabuya para sa sinumang makapagbibigay ng impormasyon na magreresulta sa pagkakaaresto ni Ang.

Hinahanap si Ang matapos maglabas ng warrant of arrest ang mga korte sa Batangas at Laguna kaugnay ng umano’y pagkidnap at pagpatay sa mahigit 100 sabungero.

May mga ulat na posibleng tumakas siya patungong Cambodia o Thailand, ngunit itinanggi ng pamahalaan ng Cambodia na naroon ang negosyante. Sa kabila nito, naniniwala si Remulla na nasa loob pa rin ng bansa si Ang at magtatagumpay din ang awtoridad sa paghuli sa kanya.

Nagsimula na ang paglilitis laban kay Colin Gray, ang ama ng teenager na responsable sa pamamaril sa Apalachee High School noong Setyembre 4, 2024.

Nahaharap si Gray sa kasong involuntary manslaughter, second-degree murder at iba pang paglabag matapos akusahan ng mga prosecutor na binilhan niya ng AR-15-style rifle ang anak na si Colt bilang regalo noong Pasko 2023, sa kabila ng mga babala na nagbanta na ito ng school shooting online.

Sa insidente, dalawang 14-anyos na estudyante at dalawang guro ang nasawi, habang siyam ang sugatan. Si Colt Gray, na 14 taong gulang noon at ngayo’y 16, ay kinasuhan bilang adulto at naghihintay ng sariling paglilitis.

Ayon sa prosekusyon, nabigong pigilan ng ama ang pag-access ng anak sa baril kahit may mga babala mula sa awtoridad. Iginiit naman ng depensa na hindi alam ni Colin ang plano ng anak at humingi pa umano ito ng tulong para sa mental health ng bata.

Isa ito sa mga pambihirang kaso sa Estados Unidos kung saan ang magulang ay nahaharap sa kasong murder dahil sa krimeng ginawa ng sariling anak. Kamakailan, nahatulan din ng manslaughter ang mga magulang ng isa pang school shooter sa Michigan noong 2021.

Patuloy ang mainit na debate sa US hinggil sa gun control, lalo na’t madalas ang insidente ng mass shootings at nananatiling maluwag ang regulasyon sa pagbili ng baril.