Ipinag-utos ng Regional Trial Court ng Mandaluyong sa Department of Foreign Affairs (DFA) na kanselahin ang mga passport nina dating PCSO general manager Royina Garma at dating PNP commissioner Edilberto Leonardo, kaugnay ng pagpatay kay Wesley Barayuga noong 2020.

Kasama rin sa utos ng korte na kanselahin ang mga passport nina Santie Mendoza, Nelson Mariano, at Jeremy Causapin, na pawang nahaharap sa murder at frustrated murder charges.

Ayon sa desisyon noong Oktubre 15, may “seryosong panganib” na tatakas ang mga akusado upang takasan ang paglilitis. Kasabay ng kanselasyon ng passport, naglabas din ang korte ng hold departure order (HDO) laban sa kanila.

Sa limang akusado, tanging sina Mendoza at Mariano lamang ang nasa kustodiya ng National Bureau of Investigation (NBI), habang nananatiling fugitives ang iba. Parehong not guilty ang plea nina Mendoza at Mariano, at itinakda ng korte ang pre-trial conference sa Nobyembre 12.

Matatandaang sina Garma at Leonardo ay tinukoy bilang mga umano’y mastermind sa pagpatay kay Barayuga, dating PCSO board secretary, na binaril sa Mandaluyong noong 2020.

Noong Setyembre, sinabi ni dating Justice Secretary Crispin Remulla na na-deport mula Estados Unidos si Garma matapos tanggihan ang kanyang asylum request. Nabatid din umano na nakatakda siyang magpatotoo sa International Criminal Court (ICC) laban sa dating Pangulong Rodrigo Duterte.

Tinuligsa ni Marikina Mayor Marjorie Ann Teodoro ang Department of Health (DOH) matapos nitong isama sa listahan ng mga “hindi gumaganang” super health centers ang pasilidad sa Barangay Concepcion Dos, na ayon sa alkalde ay naantala dahil sa kakulangan ng pondo mula sa DOH.

Ayon kay Teodoro, hindi dapat linlangin ng DOH ang publiko, dahil tanging para lamang sa unang phase ng konstruksyon ang inilabas na pondo. Ang proyekto ay nakatakdang maging apat na palapag, ngunit natapos pa lang ang unang yugto.

“Ito ay hindi matatapos kung kulang ang pondo. Mali ang sabihing kayang tapusin ang buong pasilidad gamit lang ang halagang inilabas ng DOH,” giit ng alkalde.

Dahil hindi pinansin ng DOH ang kanilang hiling na P180 milyon karagdagang pondo, naglaan na mismo ang lokal na pamahalaan ng P200 milyon mula sa sariling pondo para maituloy ang proyekto, ayon kay City Administrator Mark Castro.

Una nang sinabi ni Health Secretary Teodoro Herbosa na dapat natapos na ang proyekto, na kabilang sa 297 super health centers sa bansa na hanggang ngayon ay hindi pa rin operational.

Ngunit giit ni Mayor Teodoro, hindi dapat sisihin ang Marikina City dahil ang tunay na problema ay ang kulang na alokasyon ng pondo mula sa DOH.

Isinumite ni Marikina 1st District Rep. Marcelino Teodoro ang kanyang counter-affidavit sa Department of Justice (DOJ) bilang tugon sa kasong rape at acts of lasciviousness na isinampa laban sa kanya ng dalawang babaeng pulis.

Kasabay nito, 28 saksi — kabilang ang ilang kapwa pulis ng mga nagsampa ng reklamo — ang naghain din ng kani-kanilang affidavit upang pabulaanan ang mga paratang laban sa kongresista.

Ang dalawang pulis na nagsampa ng kaso ay dati umanong close-in security ni Teodoro noong siya ay alkalde pa ng Marikina.

Dumating si Teodoro sa DOJ kasama ang kanyang asawa na si Marikina Mayor Marjorie Ann Teodoro at ang kanyang abogado na si Atty. Alma Mallonga.

Noong Lunes, nagsampa rin ang kongresista ng perjury case laban sa dalawang pulis sa Manila prosecutor’s office, at pinag-iisipan niyang magsampa pa ng reklamo sa Internal Affairs Service ng PNP laban sa kanila.