Kinumpirma ng broadcast journalist na si Atom Araullo ang matagal nang umiiral na balita tungkol sa kaniyang long-term girlfriend, at inamin na napag-uusapan na nila ang tungkol sa kasal.

Sa panayam ni Boy Abunda na ipinalabas noong Nobyembre 28, diretsahang tinanong si Atom kung may karelasyon siya. “Matagal na… We don’t even count. It’s been a while,” sagot niya, kasabay ng pagbanggit na ang kanyang girlfriend ay “public” at nakikita naman sila ng netizens sa labas—bagama’t tumanggi siyang pangalanan ito.

Sa Fast Talk segment ng programa, inamin ni Atom na taken siya, na umibig siya sa isang co-worker, at handa na siyang mag-settle down. Hindi man sila nagmamadali, malinaw na napag-uusapan na nila ang posibilidad ng pag-aasawa.

Matagal nang pinag-uusapan ang umano’y relasyon ni Atom at kapwa journalist na Zen Hernandez, lalo na noong mag-post si Atom ng larawan nila para sa 41st birthday ng dalaga noong 2022. Bagama’t hindi pa rin nila tahasang kinukumpirma ang mga pangalan, lumalakas ang haka-haka sa kanilang dalawa.

Muling bumalik sa kalsada si Miss Universe 2018 Catriona Gray ngayong Nobyembre 30, kasabay ng paggunita sa Bonifacio Day, upang manawagan ng malinaw at agarang aksyon laban sa lumalalang isyu ng korapsyon sa bansa. Sa harap ng mga nagpoprotesta sa People Power Monument sa EDSA, tinuligsa niya ang “nakabibinging katahimikan” ng mga opisyal na dapat nagsasampa na ng kaso laban sa mga sangkot sa kontrobersyal na flood control scandal.

Suot ang off-white na kasuotan, iginiit ni Gray na pagod na ang mga Pilipino na makita kung paanong ninanakaw ng korapsyon ang pondong para sana sa pagkain, gamot, silid-aralan, at kaligtasan ng bawat pamilya. Bilyon-bilyong piso raw ang nawawala nang walang napapanagot.

Matapos ring sumama sa mga protesta noong Setyembre 21, binigyang-diin ni Gray na kahit ilang buwan na ang lumipas, wala pang mataas na opisyal ang nakukulong. Isa raw itong malinaw na tanda ng isang sistemang pumapabor sa iilan.

Ayon kay Gray, hindi dapat manahimik ang publiko. Aniya, kung isang departamento pa lamang ang iniimbestigahan ay marami pang posibleng katiwalian sa edukasyon, agrikultura, kalusugan, at iba pang sektor na maaaring lumabas.

Nanawagan siya sa Ombudsman na isampa na ang mga kaso, sa Senado na suspindihin ang mga opisyal na nadadawit, at sa Kongreso na ipasa ang anti-political dynasty bill upang matigil ang pamamayani ng kapangyarihan sa iisang pamilya.

Bago matapos, nanguna siya sa isang panalangin para sa bayan at pinaalalahanan ang lahat na huwag kalimutan ang dahilan ng kanilang galit. Aniya, hindi hahayaan ng henerasyong ito na manaig ang korapsyon.

Handang-handa nang pasabugin muli ng BINI ang Philippine Arena sa kanilang major concert na “BINIfied” ngayong Nobyembre 29—at mas espesyal ito dahil sasamahan sila ng international DJ na si Jimmy Nocon.

Ipinahayag na magiging special guest si Nocon, isang DJ na nakapag-perform na sa iba’t ibang global stages. Pero ayon sa kanya, iba pa rin ang pakiramdam ng pagtugtog sa Pilipinas, lalo na sa pinakamalaking arena ng bansa — at kasama pa ang P-pop sensation na BINI.

Aniya, dream come true ang makasama ang grupo sa entablado. Noong tinanong siya noon kung sino ang gusto niyang makatrabaho, sagot niya ay sina Gary Valenciano at BINI. Natupad na niya ang una sa “ASAP,” at ngayon nama’y si BINI sa isang monumental na concert.

Pinuri rin ni Nocon ang grupo, na aniya’y may kakaibang energy at personalidad bawat miyembro. Bilang isang high-energy DJ, handa siyang sabayan at palakasin pa ang performance ng BINI gamit ang kanyang signature style: live instrument integration, dynamic presence, at full-on party mixes.

Inihayag din niya na ang kanyang concert set ay magiging malupit na halo ng K-pop at P-pop hits mula sa iba’t ibang girl at boy groups — isang eksklusibong party vibe na ginawa mismo para sa BINI crowd.

Habang nagpapatuloy ang rehearsals, naalala ni Nocon ang panahon na tinutugtog niya ang “Salamin” at “Pantropiko” sa Star Magic Ball—mga kantang hinihiling pa noon ng BINI girls. Ngayon, ipi-perform na nila iyon nang magkakasama sa pinakamalaking yugto ng kanilang career.

Para kay Nocon, at para sa fans, isang espesyal na pagsasanib-puwersa ang naghihintay: BINI power + DJ Jimmy Nocon Experience = isang gabi ng purong enerhiya.