Muling pinatunayan ni Alex Eala ang husay laban sa beteranang si Donna Vekic matapos magwagi ng 6-3, 6-4 sa Kooyong Classic sa Melbourne—isang kumpiyansang panalo bago ang kanyang main draw debut sa Australian Open ngayong weekend.

Tumagal lamang ng mahigit isang oras ang laban at nagsilbing huling paghahanda ni Eala bago harapin ang mga pinakamahuhusay na manlalaro sa unang Grand Slam ng taon. Nitong nakaraang linggo, tinalo rin ng 20-anyos na Filipina si Vekic sa ASB Classic sa Auckland sa isang comeback win, na nagbunsod sa kanyang Final Four finish sa WTA Tour.

Kabilang sina Eala, Vekic, at Wang Xinyu sa Philippine Women’s Open na gaganapin sa Enero 26–31 sa Maynila, bagama’t nakadepende pa ang paglahok ni Eala sa magiging takbo ng kanyang kampanya sa Australian Open. Dati ring world No. 2 sa juniors, si Eala ay kampeon sa girls’ doubles ng 2020 Australian Open, patunay ng kanyang patuloy na pag-angat sa pandaigdigang entablado.

Handa nang salubungin ng Maynila ang tennis world sa kauna-unahang WTA 125 Philippine Women’s Open na gaganapin sa Enero 26 hanggang 31 sa Rizal Memorial Sports Complex Tennis Center.

Pangungunahan ang elite field ng German star na si Tatjana Maria, WTA No. 42 at dating Wimbledon semifinalist. Kasama rin sa mga inaabangang kalahok sina China’s Wang Xinyu (No. 43) at Filipina ace Alex Eala, na umabot na sa career-high na No. 49 sa world rankings.

Si Eala, na inspirasyon sa pagdadala ng WTA 125 event sa bansa, ay nakalistang wildcard dahil nakadepende pa ang kanyang paglahok sa magiging resulta ng kanyang kampanya sa Australian Open. Sa kabila nito, buo ang suporta ng bansa sa kanyang laban sa Melbourne.

Makakasama rin sa torneo sina Donna Vekic, Solana Sierra, Lulu Sun, Moyuka Uchijima, at Polina Kudermetova, pawang mga nakalaban na ni Eala sa mga nakaraang torneo. Isa pang Pilipina ang sasabak sa main draw—ang No. 2 ng bansa na si Tennielle Madis, na bahagi ng women’s team na nag-uwi ng bronze sa SEA Games.

Samantala, halos tapos na ang malawakang renovation ng venue na nasa 85 porsiyento na ang completion, at kasalukuyan nang isinasagawa ang pre-qualifying rounds—hudyat na handa na ang bansa para sa makasaysayang tennis event.

Mabilis ang naging simula ng 2026 para kay Alex Eala matapos maitala ang career-high na world ranking na No. 49 sa Women’s Tennis Association (WTA), ilang araw bago ang kanyang makasaysayang paglahok sa Australian Open.

Umakyat ng apat na puwesto si Eala mula No. 53 matapos magtala ng semifinal finish sa ASB Classic sa Auckland, New Zealand, na nagdagdag ng mahalagang puntos sa kanyang ranking. Mula sa 1,076 points sa pagsisimula ng taon, umabot na siya sa 1,159 puntos.

Ang 20-anyos na Filipina—ang kauna-unahang Pilipina na nakapasok sa Top 50 ng WTA—ay nalampasan ang sarili niyang dating career-best na No. 50 na naitala noong pagtatapos ng 2025.

Sa kanyang pagtakbo sa Auckland, tinalo ni Eala ang tatlong Top-80 players bilang No. 4 seed, kabilang sina Donna Vekic, Petra Marcinko, at Magda Linette, bago yumuko sa dikit na laban kontra kay Wang Xinyu ng China sa semifinals.

Ayon kay Eala, dala niya sa bagong taon ang mas matapang na pangarap at mas malinaw na layunin, habang pinahahalagahan ang suporta ng mga taong patuloy na naniniwala sa kanya.

Sunod na sasabak si Eala sa Kooyong Classic sa Melbourne—isang imbitasyon lamang na exhibition tournament—bago ang mas malaking hamon sa Australian Open.

Makakasama niya roon ang ilang beteranong manlalaro, kabilang muli si Vekic, pati sina Priscilla Hon at tennis legend na Daniela Hantuchova.