Lumagda sa kasunduan ang Department of Human Settlements and Urban Development (DHSUD) at ang Pamahalaang Lungsod ng Quezon City para sa mga rental housing project na magbibigay ng ligtas at disenteng tirahan sa mga informal settler families.

Sa ilalim ng mga kasunduan, magtatayo ng medium-rise buildings sa Barangay Sauyo at Barangay Bagong Silangan, mga lugar na tinukoy ng QC bilang angkop sa rental housing sa ilalim ng Pambansang Pabahay para sa Pilipino (4PH) Program. Tinatayang 2,900 katao na nakatira sa danger zones at tabing-ilog ang makikinabang.

Ayon sa DHSUD, pinapinal na lamang ang mga detalye ng proyekto na bunga ng serye ng pagpupulong sa pagitan ni DHSUD Secretary Jose Aliling at QC Mayor Joy Belmonte. Buong-suporta si Belmonte sa rental housing modality, na aniya’y praktikal at makataong solusyon para sa mga pamilyang hindi pa kayang magkaroon ng sariling bahay.

Sa pangunguna ng QC, pinapalawak ang abot ng 4PH Program—mula pagmamay-ari hanggang abordable na paupahan—para mas maraming pamilya ang magkaroon ng maayos at ligtas na tahanan.

Pinuna ni Sen. Raffy Tulfo si Tourism Secretary Christina Frasco dahil umano sa labis na paglitaw ng kanyang mukha sa ilang tourism promotion materials ng Department of Tourism (DOT).

Sa pagdinig ng Senate Committee on Tourism, ipinakita ni Tulfo ang mga magasin at materyales—kabilang ang isang inilabas sa Japan—kung saan kapansin-pansing si Frasco ang bida imbes na ang mga destinasyon, pagkain, at kulturang Pilipino. Aniya, “missed opportunity” ito para maipromote ang turismo ng bansa sa abroad.

Giit ni Tulfo, hindi dapat personalidad ang sentro ng marketing. “Hindi mabebenta kung puro mukha ng opisyal ang laman,” dagdag niya, sabay banggit na sa ibang bansa tulad ng Vietnam, Korea, Malaysia, at Japan, hindi inilalantad ang tourism secretaries sa ads.

Tumugon si Frasco na wala siyang pahintulot sa paggamit ng kanyang larawan at walang pondong gobyerno ang ginamit. Ayon sa kanya, kinuha lamang ang mga litrato mula sa coverage ng events at wala umanong interview na isinagawa. Nilinaw rin niyang wala siyang balak tumakbo sa 2028 kaya’t walang dahilan para sa self-promotion.

Iginiit naman ni Tulfo na hindi niya inaakusahan si Frasco ng pagtakbo sa eleksyon—ang punto niya, ayon sa kanya, ay kapansin-pansin umano ang anyo ng self-promotion at dapat ituon ng DOT ang promosyon sa turismo mismo, hindi sa mga opisyal.

Nagkaroon ng mainit na palitan sina Sen. Francis Pangilinan at Sen. Rodante Marcoleta hinggil sa eksaktong saklaw at koordinado ng bahagi ng West Philippine Sea (WPS) na sakop ng soberanong karapatan ng Pilipinas.

Sa deliberasyon ng Senate Resolution No. 256, iginiit ni Pangilinan na batay sa datos ng Philippine team sa International Arbitral Tribunal (IAT), may karapatan ang bansa sa humigit-kumulang 500,000 square kilometers ng South China Sea, alinsunod sa 200-nautical mile Exclusive Economic Zone (EEZ) at sa 2016 arbitral ruling na nagbasura sa 9-dash line ng China.

Tutol naman si Marcoleta, na nagsabing nasa 381,000 square kilometers lamang ang WPS ayon sa National Security Council, at kinuwestiyon ang kawalan umano ng tiyak na metes and bounds o eksaktong koordinado ng WPS. Aniya, hindi malinaw kung sapat ang mga umiiral na batas para tukuyin ang buong saklaw, lalo na ang ilang bahagi ng Kalayaan Island Group na lampas sa 200 nautical miles.

Pinanindigan ni Pangilinan na pinal na ang arbitral ruling at hindi na dapat kuwestiyunin ang hurisdiksiyon ng Pilipinas. Sagot ni Marcoleta, bagama’t invalid ang 9-dash line, hindi raw tinukoy ng ruling kung saan eksaktong nagtatapos ang WPS.

Sa gitna ng diskusyon, iminungkahi ni Majority Leader Miguel Zubiri na balikan ang mga umiiral na batas tulad ng RA 9522 at RA 12064. Gayunman, nanatiling hindi kumbinsido si Marcoleta, na iginiit na may mga isla at features na hindi umano saklaw ng malinaw na depinisyon.