Umalis si Manny “Pacman” Pacquiao sa reality competition show na “Physical: Asia” matapos niyang ipahayag na kailangan niyang bumalik sa Pilipinas para gampanan ang isa pang mahalagang tungkulin.

Sa Episode 5 ng nasabing palabas, humingi ng paumanhin ang Pambansang Kamao sa kanyang mga kasamahan.

“I have to leave the competition and return to the Philippines because of another obligation in my home country,” pahayag ni Pacquiao. “I also want to apologize to my team. As a team captain, I was really proud to represent the Philippines.”

Pumalit bilang Team Captain ng Team Philippines si Justin Hernandez, ang unang Pilipinong lalaki na lumahok sa CrossFit Games.

Simula Episode 6, bubuuin ng mga sumusunod ang Team Philippines:

• Justin Hernandez (captain)
• Mark “Mugen” Striegl, Fil-Am national sambo athlete
• Ray Jefferson Querubin, strongman
• Justin Coveney, national rugby player
• Robyn Lauren Brown, national hurdler
• Lara Liwanag, CrossFit athlete

Nauna nang umani ng atensyon si Pacquiao nang magpakilala siya kasama ang Team Philippines, kung saan namangha ang mga kalahok mula sa iba’t ibang bansa.

Ang “Physical: Asia” ay bagong season ng sikat na “Physical: 100” franchise, kung saan nagtatagisan ng lakas at disiplina ang mga top athletes mula sa iba’t ibang bansa sa Asya.

Handa nang ipakilala ng Viva One at Cignal Play ang bagong mystery-romance series na “Project Loki,” kung saan tampok sina Jayda Avanzado at Dylan Menor sa pangunguna ng aktor-direktor Xian Lim sa kanyang unang TV directorial project.

Batay sa hit Wattpad story ni AkoSiIbarra, umiikot ang Project Loki sa kwento ni Lorelei Rios (Jayda), isang estudyanteng lumipat sa Clark University at sumali sa QED Club, isang grupo ng mga kabataang naghahantad ng mga lihim at misteryo sa campus. Ang Loki Mendez (Dylan) naman ay ang misteryosong lider ng grupo, na unti-unting nagbabago sa pagdating ni Lorelei.

Kasama rin sa cast sina Marco Gallo bilang Luthor, kapatid ni Loki; Yumi Garcia, Martin Venegas, at ilang fresh faces mula sa Viva at MediaQuest Artists Agency.

Ayon kina Jayda at Dylan, natural at effortless ang kanilang on-screen chemistry. “It just happened organically,” ani Jayda. “Nagka-connect kami agad sa first shoot, nagkuwentuhan lang kami tungkol sa music at sa roles namin.” Dagdag ni Dylan, “Ang gaan niyang katrabaho — from day one, comfortable na kami sa isa’t isa.”

Ibinahagi rin ni Dylan na malaking hamon para sa kanya ang pagganap kay Loki dahil malayo ito sa mga dating karakter niya. “Tahimik at misteryoso si Loki, samantalang ako madaldal at extrovert,” sabi niya. “Pero doon ko hinugot yung introverted side ko para maging totoo sa role.”

Para kay Direk Xian Lim, mahalaga na manatiling tapat ang adaptasyon sa orihinal na materyal. “Hindi namin binago ang essence ng kwento. Ginawa namin ang lahat para bigyan ito ng hustisya,” aniya. Ipinagmamalaki rin niya ang cast na aniya ay “mga bituin sa paggawa.”

Hindi ikinaiinis ni Kapuso actress Carla Abellana ang bansag sa kanya ng netizens bilang “Queen of Call Out.” Sa halip, natutuwa raw siya dahil nakikita niyang malikhain ang mga Pilipino sa pagbibigay ng mga palayaw online.

“Natatawa lang ako kasi sobrang creative ng mga Pilipino. Pero sa totoo lang, medyo flattered din ako,” ani Carla sa panayam niya sa Fast Talk with Boy Abunda.

Kilala si Carla sa paggamit ng social media para ipahayag ang kanyang hinaing sa mga isyung panlipunan — gaya ng mga reklamo sa billing discrepancies sa tubig at mahina o palyadong internet service. Para sa kanya, hindi ito tungkol sa pagpasikat kundi sa pagpapahayag ng saloobin ng karaniwang mamamayan.

“Tahimik lang talaga ako, pero kapag ako o ang iba ay apektado, hindi ko mapigilang mag-call out,” paliwanag niya. “Dahil sa frustration, nararamdaman kong oras na para gamitin ko ang boses ko.”

Aminado rin ang aktres na sanay na siya sa negatibong komento o bashers. “Part na ‘yun ng pagiging vocal. Hindi lahat sasang-ayon sa’yo, pero okay lang,” aniya.

Tinukoy din ni Carla ang mga isyung bumabagabag sa kanya, tulad ng korapsyon at maling paggamit ng buwis ng taumbayan. “Bilang taxpayer, nakakagalit makitang nasasayang ang pinaghirapan ng mga Pilipino. Dapat talaga may managot,” diin niya.

Bagama’t minsan na siyang natuksong pumasok sa politika, nilinaw ng aktres na hindi ito para sa kanya. “Nakakatukso, pero may konsensya ako. Ayokong pumasok sa politika para sa maling dahilan,” sabi niya.

Sa huli, ipinagdarasal ni Carla na magkaroon ng pananagutan at hustisya sa mga tiwaling opisyal:

“Ang dasal ko, sana managot ang mga dapat managot.”