Hindi ikinaiinis ni Kapuso actress Carla Abellana ang bansag sa kanya ng netizens bilang “Queen of Call Out.” Sa halip, natutuwa raw siya dahil nakikita niyang malikhain ang mga Pilipino sa pagbibigay ng mga palayaw online.

“Natatawa lang ako kasi sobrang creative ng mga Pilipino. Pero sa totoo lang, medyo flattered din ako,” ani Carla sa panayam niya sa Fast Talk with Boy Abunda.

Kilala si Carla sa paggamit ng social media para ipahayag ang kanyang hinaing sa mga isyung panlipunan — gaya ng mga reklamo sa billing discrepancies sa tubig at mahina o palyadong internet service. Para sa kanya, hindi ito tungkol sa pagpasikat kundi sa pagpapahayag ng saloobin ng karaniwang mamamayan.

“Tahimik lang talaga ako, pero kapag ako o ang iba ay apektado, hindi ko mapigilang mag-call out,” paliwanag niya. “Dahil sa frustration, nararamdaman kong oras na para gamitin ko ang boses ko.”

Aminado rin ang aktres na sanay na siya sa negatibong komento o bashers. “Part na ‘yun ng pagiging vocal. Hindi lahat sasang-ayon sa’yo, pero okay lang,” aniya.

Tinukoy din ni Carla ang mga isyung bumabagabag sa kanya, tulad ng korapsyon at maling paggamit ng buwis ng taumbayan. “Bilang taxpayer, nakakagalit makitang nasasayang ang pinaghirapan ng mga Pilipino. Dapat talaga may managot,” diin niya.

Bagama’t minsan na siyang natuksong pumasok sa politika, nilinaw ng aktres na hindi ito para sa kanya. “Nakakatukso, pero may konsensya ako. Ayokong pumasok sa politika para sa maling dahilan,” sabi niya.

Sa huli, ipinagdarasal ni Carla na magkaroon ng pananagutan at hustisya sa mga tiwaling opisyal:

“Ang dasal ko, sana managot ang mga dapat managot.”

Kumpirmado ang pag-alis ng kilalang star maker na si Johnny Manahan, o mas tanyag bilang “Mr. M,” mula sa GMA Network at nakatakdang lumipat sa TV5 ngayong linggo.

Ayon sa ulat ng PEP.ph, pipirma si Mr. M ng kontrata sa TV5 sa mga susunod na araw. Si Manahan ay nagsilbi bilang consultant ng GMA Artist Center, na kalaunan ay naging Sparkle GMA Artist Center, kung saan tumulong siyang hubugin ang mga bagong talento ng network.

Sa kasalukuyan, siya na rin ang direktor ng “Vibe,” isang OPM music countdown show sa TV5. Ayon sa kolumnista at TV5 reporter na MJ Marfori, aktibong nakikibahagi si Mr. M sa konsepto, packaging, at pagpili ng mga bagong “Vibe Jocks,” kabilang ang Gen V — mga baguhang personalidad na tinuturing na susunod na henerasyon ng TV5 talents.

Dagdag pa ng ulat, posible ring italaga si Mr. M sa pamamahala ng mga talento ng MediaQuest, ang kumpanya sa likod ng TV5.

Puno ng saya at kanta ang isang museo sa Wiesbaden, Germany nitong Linggo matapos dagsain ng mga tagahanga ni Taylor Swift, na gustong makita ang obrang sinasabing nagsilbing inspirasyon ng music video ng kanyang bagong awitin na “The Fate of Ophelia.”

Suot ng ilan ang puting bestidang may bulaklak sa buhok gaya ng karakter ni Ophelia sa “Hamlet” ni Shakespeare, habang ang iba nama’y kumikislap sa mga kasuotan na kahawig ng istilo ni Swift sa entablado. Ang painting na kanilang pinuntahan ay gawa ng artist na si Friedrich Heyser, na nagpapakita kay Ophelia na nakahiga sa ilog bago ito malunod—eksena ring ginaya ni Swift sa simula ng kanyang music video.

Simula nang ilabas ang kanta noong nakaraang buwan, dinarayo na ng mga Swifties ang Wiesbaden Museum para masilayan ang obra. Ayon sa isang tagahanga, nakaka-overwhelm umanong makita nang personal ang larawang nakaimpluwensiya sa idol nilang si Taylor.

Humigit-kumulang 200 fans ang dumalo sa sold-out event, kung saan sinamahan sila ng lecture tungkol sa painting bago nila sabay-sabay inawit at sinayawan ang “The Fate of Ophelia.” Siyempre, hindi rin nawala ang selfie moments sa harap ng sikat na obra.