Mukhang ayaw ni Daniel Padilla na bigyan ng showbiz kulay ang mga bali-balitang may namamagitan sa kanila ng kanyang “Incognito” co-star na si Kaila Estrada.

Sa isang episode ng “Are You G?” ng The Filipino Channel na kinunan sa Korea, tinanong ni host MJ Felipe ang aktor kung may espesyal na babae na bang nagpapasaya sa kanya ngayon.

Ngumiti muna si Daniel at pabirong sagot: “Kain muna tayo,” bago nagbigay ng mas seryosong pahayag.
“Huwag nating i-pressure mga sarili natin, huwag na nating ilagay sa ganun, i-showbiz pa ’yun,” ani Daniel. “Lalabas at lalabas ’yan, pero ayoko lang na may naghihintay na… hayaan na nating mangyari ang mangyayari.”

Paliwanag pa ng aktor, natural na mapag-usapan ang personal na buhay ng mga artista, pero may karapatan pa rin silang pumili kung kailan at paano ito haharapin sa publiko.

Nang tanungin naman kung masaya siya, mabilis ang sagot ni Daniel:
“Paano ako hindi magiging masaya? Galing kami sa isang masayang concert, andito ako sa Korea with my family and friends, celebrating life, and I just received an award from people who love me. So anong rason para maging malungkot?”

Matatandaang kamakailan lang ay ibinunyag ni Ogie Diaz na magkarelasyon umano sina Daniel at Kaila. Gayunman, tila mas pinipili ni Daniel ngayon ang katahimikan at iwas sa showbiz intriga — isang hakbang na marami ang humahanga dahil ipinapakita niyang may mga bagay na mas maganda kung pribado na lang.

Nagningning sina Nayeon, Jihyo, Tzuyu, at Momo ng TWICE sa Victoria’s Secret Fashion Show 2025 sa New York City, kung saan sila ang unang K-pop girl group na nagtanghal sa prestihiyosong event.

Dumalo ang apat na miyembro sa pink carpet bago ang kanilang live performance, suot ang elegante nilang black-and-white outfits. Umagaw ng pansin si Tzuyu sa kanyang white cutout gown, habang nagsuot ng magkakaibang estilo ng itim sina Nayeon, Jihyo, at Momo — mula sa cutout dress hanggang sa chic lace at tailored suit.

Ayon kay Jihyo, hindi nakadalo ang ibang miyembro ng grupo ngunit umaasa siyang magugustuhan pa rin ng fans ang kanilang espesyal na apat-kataong performance.

Kasama ng TWICE sa lineup ng mga performer sina Karol G, Madison Beer, at Missy Elliott. Ang event ay bahagi ng muling pagbangon ng Victoria’s Secret show, na nagbalik noong nakaraang taon.

Ang pagtatanghal ng TWICE ay dumating din sa gitna ng kanilang This Is For World Tour, na magpapatuloy sa 2026 sa North America at Europe.

Handa na si Ashtine Olviga na sumabak sa mas malaking entablado sa kanyang MMFF debut ngayong 2025 sa pelikulang “Manila’s Finest,” na idinirek ni Raymond Red at pinagbibidahan ni Piolo Pascual.

Gagampanan ni Ashtine ang papel ni Agnes, anak ng beteranong pulis na si Lt. Homer Magtibay (Piolo Pascual). Ang pelikula, na itinakda sa taong 1969, ay umiikot sa mga pulis ng Maynila na pilit pinapanatili ang kanilang katapatan at dangal sa gitna ng lumalalang kontrol ng estado.

Aminado ang aktres na kinakabahan sa unang araw ng shooting kasama si Piolo, ngunit labis ang kanyang pasasalamat sa pagkakataong makatrabaho ang mga batikang artista.

“Kinabahan ako kung kaya ko bang ibigay yung emosyon, pero lahat sila mababait at tinulungan ako,” sabi ni Ashtine.

Bukod kay Piolo, tampok din sa pelikula sina Enrique Gil, Kiko Estrada, Romnick Sarmenta, Joey Marquez, Jasmine Curtis-Smith, at Rica Peralejo-Bonifacio, kabilang sa powerhouse ensemble cast.

Para kay Ashtine, higit sa tropeo, karanasan at pagkatuto ang pinahahalagahan niya sa proyekto.

“Ang goal ko talaga ay mag-enjoy at matuto. Kung may award man, bonus na lang yun,” aniya.

Suportado rin siya ng kanyang onscreen partner na si Andres Muhlach, na masayang-masaya sa bagong milestone ng aktres.

“We celebrate each other’s wins. Lahat kami galing sa zero, kaya bawat tagumpay, sabay naming ipinagdiriwang,” dagdag ni Ashtine.

Sa ngayon, umaasa si Ashtine na magiging makahulugan at memorable ang kanyang unang MMFF experience—at baka sa susunod, kasama na rin si Andres sa big screen.