Patuloy pa ring inaapula ng mga bumbero nitong Huwebes ang napakalaking sunog na tumupok sa isang high-rise housing complex sa Tai Po, Hong Kong, na kumitil na ng hindi bababa sa 44 katao at nag-iwan ng daan-daang nawawala. Itinuturing ito bilang pinakamatinding sunog sa lungsod sa loob ng maraming dekada.

Nagsimula ang apoy noong Miyerkoles hapon sa bamboo scaffolding ng Wang Fuk Court, isang walong-building estate na may 2,000 apartment at kasalukuyang sumasailalim sa malawakang pagkukumpuni. Dahil umano sa naiwanang madaling-suminding materyales sa maintenance work, mabilis na kumalat ang apoy, ayon sa pulisya. Tatlong lalaki ang inaresto kaugnay ng insidente.

Ayon sa mga nakaligtas, maraming residente ang matatanda at hirap gumalaw. Dahil sarado ang mga bintana habang may pagkukumpuni, may ilan pang hindi agad nakapansin na may sunog at kinailangang tawagan ng kapitbahay para makalikas.

Kabilang sa mga nasawi ang isang 37-anyos na firefighter na nawalan ng kontak sa kanyang team bago matagpuang may matinding paso. Higit 900 residente naman ang pansamantalang inilikas sa mga evacuation center.

Sinabi ng mga opisyal na may mga palapag na hindi pa nila maabot dahil sa matinding init, at nananatili ang panganib ng pagkalaglag ng nagliliyab na scaffolding. Patuloy ding iniimbestigahan kung paano kumalat ang apoy sa iba pang gusali, na posibleng dulot ng malakas na hangin at nagliliparang debris.

Nagpaabot ng pakikiramay si Chinese President Xi Jinping at nangakong tutulungan ang mga apektado. Ipinahayag din ni Hong Kong Chief Executive John Lee ang matinding pagdadalamhati at tiniyak ang buong suporta ng pamahalaan.

Inalis ng mga awtoridad sa Turkey ang dating gunman na si Mehmet Ali Agca mula sa bayan ng Iznik nitong Huwebes, ilang oras bago dumating si Pope Leo XIV sa lugar. Si Agca ang bumaril at malubhang nanakit kay Pope John Paul II sa St. Peter’s Square noong 1981.

Ayon sa Turkish media, sinabi ni Agca na nais niyang makausap si Pope Leo “ng dalawa o tatlong minuto.” Gayunman, bago pa man dumating ang Santo Papa, ineskortan na siya palabas ng Iznik upang maiwasan ang anumang posibleng aberya.

Matapos ang pag-atake noong 1981, hinatulan si Agca ng habambuhay na pagkakakulong sa Italy at kalauna’y inilipat sa Ankara, Turkey, kung saan siya nakalaya noong 2010 matapos ang 29 taon sa bilangguan. Personal siyang dinalaw ni Pope John Paul II noong 1983, kung saan nagpakita siya ng pagsisisi, bagaman hindi niya ibinunyag ang motibo sa pag-atake.

Nasa Turkey ngayon si Pope Leo XIV para sa kanyang unang biyahe bilang pinuno ng Simbahang Katolika. Ang pagbisita niya sa Iznik ay bilang paggunita sa ika-1,700 anibersaryo ng First Council of Nicaea—isang makasaysayang pagtitipon ng mga obispo noong taong 325 na naglatag ng isa sa pinakamahalagang pananampalatayang Kristiyano.

Si Hakyung Lee, isang 45-taong-gulang na mamamayan ng New Zealand na nagmula sa South Korea, ay nahatulan ng habambuhay na pagkakakulong matapos mapatunayang pinatay ang kanyang dalawang anak sa tinaguriang “suitcase murders” ng bansa. Pinatawan siya ng minimum na 17 taong hindi maaaring makalaya ng Hukom na si Geoffrey Venning, na tinukoy ang mga bata bilang “labis na bulnerable.”

Pinatay ni Lee ang kanyang anak na si Minu Jo at Yuna Jo, 6 at 8 taong gulang, gamit ang labis na dosis ng reseta noong 2018. Natuklasan lamang ang mga katawan noong 2022 nang buksan ng isang pamilya ang isang storage locker na kanilang nabili sa auction. Matapos ang krimen, nagpalit ng pangalan si Lee at lumipad pabalik sa South Korea bago siya ma-extradite sa New Zealand para sa paglilitis.

Ipinakita sa paglilitis ang matinding sakit at takot na iniwan ng mga krimen kay Lee sa kanyang pamilya. Bagamat kinilala niyang siya ang pumatay, umapela ang kanyang mga abogado sa insanity defense, na sinasabing ang pagkamatay ng kanyang asawa noong 2017 ay nagdulot ng malalim na depresyon. Ngunit pinatunayan ng prosekusyon na alam ni Lee ang kanyang ginagawa, dahil sa mga pagsisikap niyang itago ang mga katawan at tumakas sa bansa.