Sa gitna ng imbestigasyon sa umano’y “ghost” flood control projects sa Bulacan, tuloy ang konstruksyon ng isang proyektong nakatayo sa reclaimed area ng Laguna de Bay na inuugnay sa parehong kontratista.

Ang proyekto na may halagang P94.04 milyon ay ipinapatupad ng Department of Public Works and Highways (DPWH) Metro Manila 1st District Engineering Office at iginawad sa Topnotch Catalyst Builders Inc., kumpanyang nasangkot sa kontrobersyal na flood control scam sa Bulacan.

Sa datos ng DPWH transparency portal, ang proyekto—“Improvement of Laguna Lakeshore Area, Barangay Lower Bicutan (Phase I), Taguig City”—ay nakalista bilang flood control structure, partikular na slope protection. Gayunman, nauna nang sinabi ng DPWH na road project ito, hindi flood control.

Nauna nang iniulat na ang Topnotch ay nabigyan ng mahigit P170 milyon na flood control at slope protection projects sa Bulacan, kung saan umamin sa katiwalian ang dating district engineer na si Henry Alcantara. Ang may-ari ng kumpanya na si Eumir Villanueva ay nasa lookout bulletin ng Department of Justice kaugnay ng patuloy na imbestigasyon.

Sa kabila ng suspensyon ng reclamation activities ng Laguna Lake Development Authority, nakita sa site ang patuloy na paglipat ng lupa at konstruksyon. Ayon sa tala, 70% na ang natatapos sa Phase I, habang 59% naman sa Phase II na may kahalintulad na halaga.

Kapansin-pansin din na hindi lumalabas ang nasabing proyekto sa flood control list ng “Sumbong sa Pangulo” website ni Ferdinand Marcos Jr..

Sa kabila ng pagkakadawit sa Bulacan scandal, may 68 pang aktibong kontrata sa gobyerno ang Topnotch hanggang Pebrero 17, batay sa DPWH records.

Mahigit 1,000 tauhan ng Bureau of Fire Protection (BFP) ang haharap sa kasong kriminal dahil umano sa paglabag at pag-iwas sa body-worn camera policy ng Department of the Interior and Local Government (DILG).

Ayon kay DILG Secretary Jonvic Remulla, natuklasan sa validation na patuloy ang reklamo ng mga negosyante laban sa ilang fire safety inspectors. Iniiwasan umano ng mga ito ang pagsusuot ng body cameras upang makapuwersa ng pagbili ng fire extinguishers—na kadalasang overpriced—kapalit ng pag-apruba ng inspeksiyon.

Ibinahagi rin ni Remulla na mismong ang kanyang pamangkin na may-ari ng convenience store sa Silang, Cavite ay naging target umano ng ganitong gawain. Kahit nabayaran na ang kaukulang fire safety inspection fee, hindi umano ininspeksiyon ang establisimyento at pinabili pa ng fire extinguisher bago ito masuri.

Dahil dito, inanunsiyo ni Remulla na magsasampa ng kaso sa Office of the Ombudsman laban kay BFP chief Jesus Fernandez at iba pang opisyal ng ahensiya kaugnay ng alegasyon ng korapsyon at bid-rigging.

Tinawag ni Senador Robin Padilla na “mahina” ang kabataan ngayon kumpara sa mga lumaki noong dekada ‘80 at ‘90.

Sa pagdinig ng Senate committee on public information and mass media na kanyang pinamumunuan, sinabi ni Padilla na mas matatag umano ang mga kabataan noon dahil nasanay silang maglaro sa kalsada, mag-camping, at makipagkaibigan nang personal. Aniya, hindi sila “iyakin” at natutong harapin ang problema sa murang edad.

Ikinumpara rin niya ang noon at ngayon pagdating sa mental health, sinasabing hindi uso ang salitang “depression” noong panahon nila, samantalang ngayon ay pati mga bata ay gumagamit na ng naturang termino.

Dahil dito, iginiit ng senador na dapat i-regulate ang paggamit ng social media ng mga kabataan, dahil aniya’y nagiging “adik” ang ilan dito.

Samantala, ayon kay Berni Moestafa ng Meta, hindi kailangang tuluyang pagbawalan ang mga bata sa digital platforms. Binigyang-diin niya na may karapatan ang kabataan sa access, ngunit dapat tiyaking may sapat na proteksiyon para sa kanilang kaligtasan online.