Nagbukas ng saloobin si Kapuso actress Kylie Padilla tungkol sa kanyang breakup at kasalukuyang relasyon bilang co-parents ng dating asawang si Aljur Abrenica. Sa kanyang pag-guest sa programang “Your Honor” nina Chariz Solomon at Buboy Villar, diretsahang nilinaw ni Kylie na hindi siya ang unang nag-cheat sa kanilang relasyon.

Ayon kay Kylie, mahalaga sa kanya na maitama ang mga maling akala ng publiko tungkol sa kanilang hiwalayan. Bukod dito, ibinahagi rin niya na maayos ang kanilang co-parenting setup para sa mga anak na sina Alas at Axl.

Aniya, halos 80% ng oras ay nasa kanya ang mga bata, kaya siya rin ang sumasagot sa malaking bahagi ng gastusin. Gayunman, binibigyang-halaga niya ang opinyon ng kanyang mga anak at hinahayaan silang pumili kung kailan nila gustong makasama ang kanilang ama—isang sistemang aniya’y nakatulong para manatiling maayos ang relasyon ng mga bata kay Aljur.

Pagdating sa usaping pinansyal, sinabi ni Kylie na may regular silang usapan ni Aljur tungkol sa hatian ng gastos, gaya ng matrikula at medical fees. Sa kabila ng kanilang pinagdaanan, iginiit ng aktres na nananatiling maayos at responsable ang kanilang pagtutulungan para sa kapakanan ng kanilang mga anak.

Kinasuhan ng Los Angeles police ng murder ang anak ng Hollywood director na si Rob Reiner matapos matagpuang patay ang beteranong filmmaker at ang kanyang asawa sa kanilang bahay sa Brentwood, Los Angeles.

Ayon sa pulisya, inaresto si Nick Reiner, 32, ilang oras matapos madiskubre ang mga bangkay nina Rob Reiner, 78, at asawang si Michele Singer Reiner, 70, noong Linggo. Batay sa mga ulat, parehong nasaksak o nilaslas ang lalamunan ng mag-asawa sa isang marahas na pagpatay.

Sinabi ni LAPD Chief Jim McDonnell na agad na ikinulong si Nick at pormal na sinampahan ng kaso. Lumabas din sa ulat ng media na nagkaroon umano ng pagtatalo si Nick at ang kanyang mga magulang sa isang Hollywood party isang gabi bago ang insidente. May kasaysayan rin umano siya ng pag-abuso sa droga.

Ayon sa TMZ, ang bangkay ng mag-asawa ay natagpuan ng kanilang anak na babae, na nagsabi sa pulisya na kapamilya ang may kagagawan ng krimen.

Habang patuloy ang imbestigasyon at pagbuhos ng pakikiramay mula sa industriya ng pelikula, umani ng batikos ang pahayag ni dating US President Donald Trump na nag-ugnay sa pagkamatay ni Reiner sa kanyang kritisismo laban sa kanya. Tinawag ng ilang kapwa Republikano ang naturang komento bilang hindi angkop at walang galang.

Isang kakaibang detalye rin ang lumutang: si Michele Reiner ang kumuha ng litrato na ginamit sa cover ng aklat ni Trump na “The Art of the Deal.”

Tatlong dekada matapos ipakilala sa mundo ng gaming, muling babandera si Lara Croft sa dalawang bagong “Tomb Raider” games, ayon sa developer na Crystal Dynamics.

Sa 2026, ilalabas ang “Tomb Raider: Legacy of Atlantis,” isang remake ng kauna-unahang laro noong 1996. Gagawin itong mula sa simula gamit ang modernong Unreal Engine 5, na may mas makabagong gameplay ngunit nananatili ang pakiramdam ng orihinal—isang “love letter” umano ng mga developer para sa mga tagahanga.

Susundan ito sa 2027 ng “Tomb Raider: Catalyst,” isang ganap na bagong kabanata sa seryeng nakabenta na ng mahigit 100 milyong kopya sa buong mundo. Itatampok dito ang mas bihasa at batikang Lara Croft, na ilalarawan bilang nasa rurok ng kanyang kakayahan.

Boses ni British actress Alix Wilton Regan ang gagamitin para kay Lara sa parehong laro, kasabay ng bagong visual design ng karakter. Ayon sa Crystal Dynamics, ang “Catalyst,” na itatakda sa India, ang pinakamalaking “Tomb Raider” game na kanilang nagawa.

Bukod sa mga laro, may ginagawa ring “Tomb Raider” series para sa Prime Video, na isinusulat ni Phoebe Waller-Bridge at pagbibidahan ni Sophie Turner bilang Lara Croft—patunay na buhay na buhay pa rin ang iconic adventurer matapos ang 30 taon.