Muling nagsama sina John Lloyd Cruz at Ellen Adarna sa isang espesyal na okasyon—ang piano recital ng kanilang anak na si Elias. Ibinahagi ni Ellen sa Instagram ang mga kuhang nagpapakitang magkasama silang magulang sa mahalagang araw ng kanilang anak.
Sa isang video, makikitang nasa entablado sina John Lloyd at Ellen kasama si Elias, na masayang hawak ang kanyang certificate of achievement matapos ang recital. Dumalo rin sa event ang kasalukuyang nobya ni John Lloyd na si Isabel Santos, na nagbahagi ng mga larawan at backstage videos ng pagtatanghal.
Muling pinost ni Ellen ang ilan sa mga ito at pabirong binati si Isabel ng, “Hi tita Sabel.” Nagbahagi rin sina Ellen at Isabel ng group photos kasama si John Lloyd at mga kaibigan.
Ang masayang tagpo ay sumasalamin sa naunang pahayag ni Ellen tungkol kay John Lloyd bilang ama. Ayon sa kanya, maaasahan at present si John Lloyd sa buhay ni Elias mula pa noong sanggol ito—patunay na kahit naghiwalay, nananatiling buo ang kanilang suporta bilang mga magulang.