Habang nagtatapos ang Season 2 ng hit crime-action drama na “Sins of the Father”, ibinahagi ng cast at creatives ang kani-kanilang karanasan—o karanasan ng kanilang mga kaibigan—tungkol sa tumitinding problema ng online scams.

Sa isang presscon, inamin ni RK Bagatsing na minsan siyang naloko sa isang investment scheme na kalaunan ay nagsara, at nalaman pa niyang ginamit ang kaniyang pangalan para makapang-akit ng iba. Si Shaina Magdayao, bagama’t hindi pa nabibiktima, ay may kaibigang nalugi matapos mag-click ng pekeng bank link.

Hindi rin ligtas si Seth Fedelin, na nabiktima ng credit card skimming matapos gamitin ang card sa isang gas station. Si Francine Diaz ay nagkuwento tungkol sa mga kaibigang naubos ang pera matapos mamuhunan sa scam na biglang nag-zero ang kanilang account.

Pinakamabigat naman ang pinagdaanan ni JC de Vera, na nawalan ng six-digit amount matapos gamitin ng scammers ang kanyang credit card nang madaling araw. Giit niya, kailangan pang paigtingin ang seguridad ng mga bangko para maprotektahan ang consumers.

Ibinahagi rin ni Jessy Mendiola ang takot na dulot ng AI deepfake matapos lumabas ang pekeng bersyon niya sa isang online gambling site. Ganito rin ang karanasan ni Gerald Anderson, na minsang pineke ang mga magulang upang manghingi ng pera sa kaniyang fans.

Nauwi sa aberya ang bakasyon nina Kaye Abad at Paul Jake Castillo sa Las Vegas matapos manakaw ang bag ng aktres na naglalaman ng kaniyang mahahalagang ID at dalawang passport.

Ayon sa post ni Kaye sa Facebook, hindi niya inakalang magiging bahagi ng kanilang family trip ang pagpunta sa police station. Kwento niya, iniwan lamang nila ang bag sa loob ng kotse habang kumakain sila ng tanghalian sa loob ng isang oras—at doon na nangyari ang nakawan.

Dagdag ni Kaye, malaking aral para sa kanila ang insidente at pinili niyang magpasalamat na ligtas ang kaniyang pamilya. “Everything can be replaced. Importante, my family is safe. God is good,” aniya.

Sa kabila ng abalang dulot ng pagkawala ng mga dokumento, nananatili siyang positibo na may dahilan ang lahat ng pangyayari.

Ipinagmamalaki ng Quezon City ang bagong titulo nito bilang UNESCO Creative City of Film — isang bihirang parangal sa Southeast Asia — at kasabay nito ay inanunsyo ng lungsod ang mga bagong hakbang para lalo pang palakasin ang lokal na industriya ng pelikula.

Sa pagbubukas ng QCinema International Film Festival sa Gateway Cineplex 18, masayang binati ni Mayor Joy Belmonte ang mga dumalo: “Welcome to Quezon City, the Film City of the Philippines… nakakakilig sabihin ‘yan.”

Ayon kay Belmonte, malaki ang papel ng QCinema sa pagkilalang ito. Sa ika-13 taon nito, lumago ang festival bilang matatag na plataporma para sa malikhaing storytelling, pagdiskubre ng bagong talento, at pagbibigay-laya sa mga filmmaker na sumubok ng bagong anyo ng pelikula. Ito rin ang tanging film festival sa bansa na buong suportado ng pamahalaan.

Inalala rin niya ang malalim na film history ng QC—mula sa iconic studios tulad ng Sampaguita at LVN Pictures hanggang sa henerasyon ng mga direktor at network na nakabase sa lungsod. Marami rin sa mga pelikulang ipinanganak sa QCinema ang nag-uwi ng parangal mula FAMAS, Gawad Urian, PPP, at international festivals sa Busan, Osaka, at New York.

Bilang tugon sa UNESCO recognition, ipinasa ng QC council ang ordinansa na lilikha ng Quezon City Screen Commission at ng isang dedicated film permits office. Layunin nitong mas mapabilis ang proseso, maprotektahan ang karapatan ng media workers, at siguraduhin ang patas at ligtas na kondisyon sa paggawa ng pelikula.

Kabilang sa mga bagong inisyatibo ang:
• mga training program sa film development, production at marketing;
• pakikipag-collaborate sa mga Southeast Asian producers at UNESCO Creative Cities;
• taunang summit kasama ang industry leaders at cultural policymakers.

Umaasa ang lungsod na ang hakbang na ito ay magbubukas ng mas maraming oportunidad para sa mga lokal na filmmaker at makahatak ng mas maraming international partnerships.