Magsisimula sa Pebrero 17 ang Year of the Fire Horse 2026, isang taon na ayon kay feng shui expert Patrick Fernandez ay puno ng mabilis na galaw, matitinding desisyon, at mataas na enerhiya. Hindi ito panahon ng pag-aalinlangan—ang Fire Horse ay para sa mga handang manguna, kumilos nang malinaw, at magbitaw ng mga hindi na aligned sa kanilang layunin.

Bilang pagsalubong sa Chinese New Year, inirerekomenda ang mga simpleng ritwal tulad ng pagsusuot ng pula at bagong gamit para sa fresh starts, pagsasalo ng pamilya at pagkain ng tikoy para sa pagkakaisa, paghahanda ng prutas para sa kasaganaan, paglalagay ng bulaklak at barya malapit sa bintana, at pagbibigay ng angpao bilang simbolo ng biyaya. Gayunman, paalala: sipag, disiplina, at maayos na ugnayan pa rin ang pundasyon ng tagumpay.

Sa Fire Horse year, gantimpala ang tapang at inobasyon ngunit mabilis ding bumibigay ang mahina ang plano. Kailangan ang malinaw na intensyon, tamang timing, at disiplina upang hindi maubos ang enerhiya.

Zodiac Forecast Summary:

• Rat: Ayusin ang relasyon at responsibilidad. Iwasan ang risk—kalusugan at seguridad ang unahin.
• Ox: Suporta at tagumpay dadaan sa tamang sistema at istruktura. Tahimik pero matatag ang pag-angat.
• Tiger: Mag-ingat sa salita, kalusugan, at gastos. Disiplina ang panangga sa gulo.
• Rabbit: Suwerte sa pera, trabaho, at relasyon. Integridad ang magbubukas ng pinto ng oportunidad.
• Dragon: May proteksiyon ngunit pabago-bago ang takbo. Pasensya at flexibility ang susi.
• Snake: Pera ay dadaan sa tamang diskarte, hindi shortcut. Alagaan ang kalusugan at emosyon.
• Horse: Tatawagin kang mamuno. Tahimik ang pagyaman, pero iwasan ang banggaan sa awtoridad.
• Goat: Malakas ang suporta ng partnerships. Panahon ng pag-angat at pagiging mas visible.
• Monkey: Paglalakbay at pag-aaral ang magdadala ng suwerte. Iwasan ang labis na pag-iisa.
• Rooster: Relasyon at social life ang lalakas. May tulong na darating sa tamang oras.
• Dog: Gantimpala sa sipag at talento. Magandang taon para sa career at creative output.
• Pig: Unti-unting pagyaman at emotional reset. Bantayan ang maliliit na gastos at leaks.

Sa kabuuan, ang 2026 ay taon ng matapang na pagkilos na may malinaw na direksyon. Sa Fire Horse, hindi sapat ang bilis—ang panalo ay ang marunong tumakbo nang handa at mulat.

Magbabalik-entablado sa Pilipinas ang Filipino-American singer na si Jessica Sanchez para sa kanyang unang solo concert sa bansa matapos ang pitong taon. Magsisimula sa Maynila ang kanyang headline concert tour, na gaganapin sa Mayo 16 (Sabado) sa Araneta Coliseum sa Quezon City.

Bagama’t lumahok siya sa isang yearend concert sa Pasay noong nakaraang taon, huling nagkaroon ng solo show si Jessica sa Pilipinas noong Nobyembre 2019. Ang concert ay pangungunahan ng Wilbros Live, at magsisimula ang bentahan ng tickets sa Pebrero 15, alas-12 ng tanghali sa TicketNet website at outlets.

Sumikat si Jessica bilang batang contestant sa unang season ng America’s Got Talent. Kalaunan, naging runner-up siya sa American Idol Season 11 na nagbukas ng kanyang recording career. Kamakailan, muli siyang bumida sa America’s Got Talent Season 20—at nagwagi pa—ilang linggo lamang matapos isilang ang kanyang unang anak kasama ang asawang si Rickie Gallardo.

Isang espesyal na homecoming concert ang inaasahan ng mga Pinoy fans mula sa tinaguriang “golden voice” ni Jessica Sanchez.

Nagbigay ng senyales ng posibleng showbiz comeback si Kris Aquino matapos ang unti-unting paggaling mula sa kanyang karamdaman nitong holiday season.

Sa isang Instagram video, ibinahagi ng “Queen of All Media” ang update sa kanyang kalusugan habang nagbubukas ng mga regalong produkto. Ipinakita rin niya ang engagement ring ng kanyang yumaong ina na si dating Pangulong Cory Aquino, na balak niyang ipamana balang araw sa bunsong anak na si Bimb.

Masigla at mas madaldal si Kris kumpara sa mga nakaraang buwan. Inihayag din niyang madidischarge na siya sa ospital matapos ang halos dalawang buwang confinement.

Bilang bahagi ng kanyang recovery, sinabi ni Kris na inirekomenda sa kanya ang light swimming, kaya naghahanap siya ng mga indoor pool malapit sa malalaking ospital sa Metro Manila. Aniya, prayoridad pa rin ang kalusugan, pero dahan-dahan na niyang binabalikan ang mga bagay na mahal niya.

Plano ni Kris na magsagawa ng weekly sit-down interviews, product features, at magbahagi ng simplified home cooking recipes. Mayroon na rin umano siyang maliit na production setup.

Tinapos niya ang post sa linyang, “Happy viewing,” hudyat ng kanyang pagbabalik—kahit paunti-unti—sa mundo ng showbiz.