Nagsimula na ang paglilitis laban kay Colin Gray, ang ama ng teenager na responsable sa pamamaril sa Apalachee High School noong Setyembre 4, 2024.

Nahaharap si Gray sa kasong involuntary manslaughter, second-degree murder at iba pang paglabag matapos akusahan ng mga prosecutor na binilhan niya ng AR-15-style rifle ang anak na si Colt bilang regalo noong Pasko 2023, sa kabila ng mga babala na nagbanta na ito ng school shooting online.

Sa insidente, dalawang 14-anyos na estudyante at dalawang guro ang nasawi, habang siyam ang sugatan. Si Colt Gray, na 14 taong gulang noon at ngayo’y 16, ay kinasuhan bilang adulto at naghihintay ng sariling paglilitis.

Ayon sa prosekusyon, nabigong pigilan ng ama ang pag-access ng anak sa baril kahit may mga babala mula sa awtoridad. Iginiit naman ng depensa na hindi alam ni Colin ang plano ng anak at humingi pa umano ito ng tulong para sa mental health ng bata.

Isa ito sa mga pambihirang kaso sa Estados Unidos kung saan ang magulang ay nahaharap sa kasong murder dahil sa krimeng ginawa ng sariling anak. Kamakailan, nahatulan din ng manslaughter ang mga magulang ng isa pang school shooter sa Michigan noong 2021.

Patuloy ang mainit na debate sa US hinggil sa gun control, lalo na’t madalas ang insidente ng mass shootings at nananatiling maluwag ang regulasyon sa pagbili ng baril.

Siyam ang nasawi at 27 ang nasugatan matapos ang pamamaril sa isang secondary school at kalapit na tirahan sa Tumbler Ridge, British Columbia, ayon sa Royal Canadian Mounted Police.

Naganap ang insidente sa Tumbler Ridge Secondary School sa maliit at liblib na bayan na may humigit-kumulang 2,400 residente. Anim ang natagpuang patay sa loob ng paaralan, habang isa pa ang namatay habang isinusugod sa ospital. Dalawa pang bangkay ang natuklasan sa isang bahay na pinaniniwalaang konektado sa insidente.

Natagpuan din ang suspek—na unang inilalarawan bilang babaeng may suot na damit—na patay dahil sa hinihinalang self-inflicted na sugat. Hindi pa inilalabas ng mga awtoridad ang pagkakakilanlan ng suspek at mga biktima.

Ayon sa Punong Ministro ng Canada na si Mark Carney, siya ay “labis na nadurog” sa trahedya at kinansela ang kanyang pagdalo sa Munich Security Conference.

Bihira ang mass shootings sa Canada, kaya’t ikinabigla ng komunidad ang insidente. Patuloy ang imbestigasyon habang sinisiyasat ng pulisya ang iba pang posibleng lugar na may kaugnayan sa pamamaril.

Bumoto ang Bangladesh sa kauna-unahang halalan matapos ang madugong pag-aalsa noong 2024 na nagpatalsik kay dating Punong Ministro Sheikh Hasina matapos ang 15 taong pamumuno.

Nangunguna sa mga kumakandidatong punong ministro si Tarique Rahman ng Bangladesh Nationalist Party (BNP), ngunit mahigpit ang laban kontra sa Jamaat-e-Islami na pinamumunuan ni Shafiqur Rahman. Kapag nagwagi, posible ang kauna-unahang Islamist-led government sa bansang may sekular na konstitusyon.

Pansamantalang pinamunuan ng Nobel laureate na si Muhammad Yunus ang bansa matapos mapatalsik si Hasina, na nahatulan ng kamatayan in absentia dahil sa umano’y krimen laban sa sangkatauhan kaugnay ng marahas na crackdown sa mga nagpoprotesta. Kasalukuyan siyang nasa India.

Bukod sa pagboto ng 300 mambabatas, isinasagawa rin ang isang referendum para sa malawakang reporma sa gobyerno, kabilang ang term limits ng punong ministro at pagpapalakas ng kapangyarihan ng pangulo at hudikatura.

Mahigit 300,000 security personnel ang ipinakalat para tiyakin ang maayos na halalan sa bansang may 170 milyong populasyon. Ayon sa mga analyst, mahalagang masiguro ang malinis at patas na botohan upang tuluyang makabangon ang Bangladesh at makapagsimula ng bagong yugto ng demokrasya.