Bumoto ang Bangladesh sa kauna-unahang halalan matapos ang madugong pag-aalsa noong 2024 na nagpatalsik kay dating Punong Ministro Sheikh Hasina matapos ang 15 taong pamumuno.

Nangunguna sa mga kumakandidatong punong ministro si Tarique Rahman ng Bangladesh Nationalist Party (BNP), ngunit mahigpit ang laban kontra sa Jamaat-e-Islami na pinamumunuan ni Shafiqur Rahman. Kapag nagwagi, posible ang kauna-unahang Islamist-led government sa bansang may sekular na konstitusyon.

Pansamantalang pinamunuan ng Nobel laureate na si Muhammad Yunus ang bansa matapos mapatalsik si Hasina, na nahatulan ng kamatayan in absentia dahil sa umano’y krimen laban sa sangkatauhan kaugnay ng marahas na crackdown sa mga nagpoprotesta. Kasalukuyan siyang nasa India.

Bukod sa pagboto ng 300 mambabatas, isinasagawa rin ang isang referendum para sa malawakang reporma sa gobyerno, kabilang ang term limits ng punong ministro at pagpapalakas ng kapangyarihan ng pangulo at hudikatura.

Mahigit 300,000 security personnel ang ipinakalat para tiyakin ang maayos na halalan sa bansang may 170 milyong populasyon. Ayon sa mga analyst, mahalagang masiguro ang malinis at patas na botohan upang tuluyang makabangon ang Bangladesh at makapagsimula ng bagong yugto ng demokrasya.

Hindi makakalaro si Giannis Antetokounmpo sa NBA All-Star Game dahil sa right calf strain, ayon sa anunsyo ng National Basketball Association. Dagdag siya sa listahan ng mga bituing hindi makadadalo sa taunang mid-season showcase na gaganapin sa Los Angeles.

Ipinalit kay Giannis ang guard ng San Antonio Spurs na si De’Aaron Fox, na personal na pinili ni NBA Commissioner Adam Silver. Mapapasama si Fox sa koponang USA Stripes sa mini-tournament na tampok ang World team at dalawang US squads.

Kabilang din sa mga hindi makalalaro sina reigning MVP Shai Gilgeous-Alexander ng Oklahoma City Thunder at si Stephen Curry ng Golden State Warriors. Samantala, duda rin ang paglahok ni Luka Doncic ng Los Angeles Lakers matapos ma-rule out sa laro kontra sa dating koponan na Dallas Mavericks.

Sa Rising Stars event, umatras din sina Cooper Flagg at Alex Sarr.

Ito ang ikalawang All-Star selection ni Fox matapos ang una noong 2023. Kasalukuyan siyang may average na 19.4 puntos, 6.3 assists, at 3.8 rebounds, habang nasa ikalawang puwesto sa Western Conference ang Spurs na may 38-16 record.

Naniniwala ang Department of Justice (DOJ) na nasa Pilipinas pa rin ang negosyanteng si Charlie “Atong” Ang, na nahaharap sa kasong kidnapping with homicide at serious illegal detention kaugnay ng pagkawala ng ilang sabungero.

Ayon kay acting Justice Secretary Fredderick Vida, batay sa intelligence reports at travel records, may indikasyong hindi pa umaalis ng bansa si Ang. May inilabas nang warrant of arrest laban sa kanya ang mga korte sa Sta. Cruz, Laguna at Lipa, Batangas.

Gayunman, hindi inaalis ng DOJ ang posibilidad na nakalabas siya sa bansa sa pamamagitan ng hindi opisyal na paraan. Sinabi ni Vida na kung may sapat na resources, posible itong magawa.

Tiniyak ng DOJ na patuloy ang koordinasyon ng mga awtoridad, kabilang ang pakikipag-ugnayan sa ibang bansa at diplomatic community, upang matunton at maaresto si Ang.