Naitala ng Quezon City ang pinakamataas na revenue sa lahat ng local government units (LGUs) noong 2024, ayon sa Commission on Audit (COA). Sa ilalim ng pamumuno ni Mayor Joy Belmonte, umabot sa P31.434 bilyon ang kita ng lungsod—mas mataas kumpara sa P29.143 bilyon noong 2023.

Batay sa 2024 Annual Financial Report ng COA, nanguna ang Quezon City sa 1,694 LGUs sa buong bansa, na kinabibilangan ng mga lungsod, probinsya, at munisipalidad. Kabilang sa pinagkukunan ng kita ang buwis, bahagi sa national taxes, internal revenue allotment, serbisyo at negosyo, at iba pang income sources.

Ayon sa audit report, malaking ambag sa pagtaas ng kita ng QC ang mas mataas na koleksiyon mula sa real property tax na umabot sa P10.32 bilyon. Tumaas din ang revenue mula sa socialized housing program beneficiaries.

Kasunod ng Quezon City sa may pinakamataas na kita ay ang Makati, Maynila, Taguig, Davao City, at Pasig—patunay ng patuloy na lakas ng ekonomiya ng mga pangunahing lungsod sa bansa.

Ipinahayag ng Malacañang na suportado ni Pangulong Ferdinand R. Marcos Jr. ang apela ng Department of Public Works and Highways (DPWH) na ibalik ang ₱45 bilyon na tinapyas sa panukalang 2026 national budget ng ahensya.

Ayon kay Palace Press Officer Claire Castro, alam na ng Pangulo ang hiling ni Public Works Secretary Vince Dizon sa bicameral conference committee. Binigyang-diin ni Castro na kung hindi maibabalik ang pondo, hindi maipapatupad ang halos 10,000 proyekto ng DPWH sa susunod na taon.

Dahil sa isyu, pansamantalang isinuspinde ang ikatlong araw ng bicam deliberations sa ₱6.793-trilyong pambansang badyet. Sinabi ni Sen. Sherwin Gatchalian na kailangan munang ayusin ang hindi pagkakasundo sa budget ng DPWH, habang iginiit ni Senate President Pro Tempore Panfilo Lacson na dapat akuin ng DPWH ang umano’y pagkakamali sa cost computations upang maiwasan ang tuluyang deadlock.

Nilinaw ni Dizon na ang hiling ng DPWH ay ibalik ang pondo na nabawas dahil sa recalculation ng project costs, batay sa updated Construction Materials Price Data (CMPD), at hindi ang mga proyektong tuluyang tinanggal sa budget.

Orihinal na humiling ang DPWH ng ₱881.31 bilyon para sa 2026. Ito ay ibinaba sa ₱625.78 bilyon ng Kamara, at muling binawasan ng Senado sa ₱571.79 bilyon, kung saan ₱45 bilyon ang tinapyas dahil sa CMPD adjustments.

Tiniyak ng Malacañang na makukulong bago mag-Pasko ang mga personalidad na sangkot sa umano’y anomalous flood control projects, alinsunod sa pangako ni Pangulong Ferdinand R. Marcos Jr.

Ayon kay Palace Press Officer Undersecretary Claire Castro, patuloy ang pag-iisyu ng warrant of arrest laban sa mga sangkot, kasunod ng inilabas na warrant laban kay dating Ako Bicol Rep. Elizaldy “Zaldy” Co. Dagdag niya, mas marami pang indibidwal ang maaaring arestuhin habang tinatrabaho ng Department of Justice at Office of the Ombudsman ang mga kaso.

Noong Nobyembre, nagbabala na ang Pangulo na matatapos ang mga kaso laban sa mga nasangkot bago magtapos ang taon. Ayon kay Marcos, buo na umano ang mga ebidensya at tiyak na haharap sa kulungan ang mga responsable.

Mariing mensahe ng Malacañang: walang magiging masayang Pasko para sa mga mapapatunayang sangkot sa katiwalian sa flood control projects ng bansa.