Muling bumida ang weightlifting sa national scene sa pagbabalik nito sa Palarong Pambansa 2025 — apat na taon matapos ang makasaysayang pagkapanalo ni Hidilyn Diaz-Naranjo ng unang Olympic gold medal ng Pilipinas.
Huling nabilang ang weightlifting sa Palaro noong 1980s, pero ngayong taon, balik-eksena ito bilang isa sa halos 30 sports events na gaganapin sa 40 venues sa Ilocos Norte. Layunin nitong magbukas ng bagong oportunidad para sa mga batang atleta at, sana, makapag-produce ulit ng world-class champions.
Tinatayang 15,000 atleta mula sa 18 rehiyon ang sasabak sa kompetisyon kung saan mahigit 1,700 medalya ang nakataya. Magsisimula ang mga laban sa Ferdinand E. Marcos Memorial Stadium, sa pamamagitan ng 3,000-meter run, long jump, at javelin throw na inaasahang magbibigay ng unang ginto sa ika-65 edisyon ng Palaro.
Ito na ang ikalawang pagkakataon na mag-host ang Ilocos Norte ng Palaro mula pa noong 1968. Tampok sa opening ceremony si Pangulong Ferdinand Marcos Jr., tubong Batac City, habang binigyang-parangal rin ang unang Olympic medalist ng bansa na si Teofilo Yldefonso mula Piddig — na siya ring naging silhouette sa opisyal na logo ng Palaro bilang pagpupugay sa kanyang pagiging atleta at bayani.
Sa kabila ng dami ng medal-rich sports tulad ng swimming, gymnastics, arnis at archery, nakatuon din ang pansin ngayong taon sa weightlifting — na muling binibigyang-halaga bilang isa sa mga posibleng maging susi sa tagumpay ng bansa sa pandaigdigang entablado.