Nag-file ng kasong libelo kahapon ang ilang vloggers laban kay Surigao del Norte Rep. Robert Ace Barbers sa Quezon City prosecutor’s office. Ito ay matapos ipag-utos ni Barbers sa National Bureau of Investigation (NBI) na imbestigahan sila kaugnay ng umano’y koneksyon nila sa iligal na droga at Philippine offshore gaming operators (POGOs).
Ayon kay Trixie Cruz-Angeles, isa sa mga nagreklamo, nagdulot ng matinding stress at takot sa kanilang pamilya ang paratang ni Barbers.
“May mga social media accounts kami na namo-monetize, pero may posibilidad na matanggal ang mga ito dahil sa bintang na fake news,” sabi ni Angeles.
Sa kanyang sulat sa NBI, tinukoy ni Barbers ang mga vloggers bilang “narco vloggers” na posibleng konektado sa POGOs.
Bilang chairman ng House committee on dangerous drugs, iginiit ni Barbers na kailangang busisiin ang mga aktibidad ng naturang vloggers upang malaman kung may kinalaman nga ang mga ito sa POGOs.
Kabilang sa iba pang nagsampa ng reklamo sina Lorraine Badoy, Krizette Chu, Cathy Binag, Joie De Vivre, MJ Quiambao Reyes, at Mark Anthony Lopez.