Tuluyan nang hahabulin ng US ang parusang kamatayan para kay Luigi Mangione, ang lalaking akusado sa pagpatay sa UnitedHealthcare CEO Brian Thompson sa isang brutal na pananambang.
Ayon kay US Attorney General Pam Bondi, planado at walang awa ang pagpatay kay Thompson, isang CEO at ama ng dalawang bata.
“Matapos ang masusing pag-aaral, inutusan ko ang mga piskal na itulak ang death penalty sa kasong ito,” sabi ni Bondi.
Politika o Hustisya?
Habang ang publiko ay hati sa opinyon—may ilan pang tinuturing na “bayani” si Mangione dahil sa galit sa mataas na presyo ng health care—tinawag ito ni Bondi na “political violence” na nagdulot ng panganib sa iba pang sibilyan.
Samantala, kumontra ang abugado ni Mangione, si Karen Friedman Agnifilo, na sinabing ito ay isang politikal na hakbang na labag sa batas at kasaysayan.
“Mula sa pagiging sirang sistema, naging barbaric na ang hustisya,” banat ni Agnifilo.
Ang Krimen at ang Paghuli kay Mangione
- Disyembre 4 – Sinundan umano ni Mangione si Thompson sa New York at binaril ito gamit ang pistolang may silencer.
- 10 araw bago ang krimen – Naglakbay siya mula Atlanta papuntang New York sakay ng bus.
- Disyembre 9 – Naaresto siya sa Altoona, Pennsylvania matapos matunton dahil sa isang tip mula sa mga empleyado ng McDonald’s.
May magkahiwalay siyang kaso sa korte ng New York at pederal na korte ng US, kung saan maaari siyang makulong habang buhay kung hindi itutuloy ang death penalty.
Ngayon, nakasalalay ang kapalaran ni Mangione sa magiging desisyon ng korte—bibitayin ba siya o makakaligtas sa pinakamabigat na parusa?