Pormal nang nagsara ang Winter Olympics matapos purihin ni International Olympic Committee president Kirsty Coventry ang edisyong ginanap sa Milan-Cortina bilang isang “bagong uri ng Winter Games.”

Sa loob ng 16 araw, ginanap ang mga kompetisyon sa iba’t ibang lugar sa Italian Alps gamit ang karamihan ay mga dati nang pasilidad—isang hakbang na nagtakda umano ng bagong pamantayan para sa mas episyenteng Olympics. Idinaos ang closing ceremony sa Verona Arena, kung saan tuluyang pinatay ang mga Olympic cauldron sa Milan at Cortina d’Ampezzo bilang hudyat ng pagtatapos.

Sa huling mga laban, naging sentro ng atensyon ang Chinese freestyle skier na si Eileen Gu matapos masungkit ang ginto sa halfpipe. Ito ang nagpatibay sa kanya bilang pinaka-dekoradong freeskier sa kasaysayan ng Winter Games. Samantala, gumawa rin ng kasaysayan ang Norwegian cross-country skier na si Johannes Klaebo sa pagwawagi ng anim na gintong medalya sa iisang edisyon—rekord sa kanyang sport.

Sa men’s ice hockey, nanaig ang Estados Unidos kontra Canada, 2-1, matapos ang overtime goal ni Jack Hughes. Ito ang unang Olympic gold ng US sa naturang event mula pa noong 1980.

Sa medal tally, nanguna ang Norway na may 18 ginto at kabuuang 41 medalya. Pumangalawa ang Estados Unidos na may 12 ginto, habang tabla sa ikatlong puwesto ang Netherlands at host na Italy na may tig-10 ginto.

Ang bandila ng Olympics ay ipinasa na sa French Alps na magsisilbing host ng susunod na Winter Games sa 2030.

Muling babalik sa ring si Manny Pacquiao ngayong Abril para sa isang 10-round exhibition fight laban sa dating world champion na si Ruslan Provodnikov.

Ayon sa mga ulat, gaganapin ang laban sa Abril 18 sa Thomas and Mack Center sa Las Vegas. Ito ay ipo-promote ng Indistry Media at Banner Promotions. Nasa opisyal na website ni Pacquiao ang detalye ng ticket sales, na may panimulang presyo na $150.

Matatandaang tinapos ni Pacquiao ang apat na taong pagreretiro noong nakaraang taon at nakipagtabla kay Mario Barrios sa Las Vegas sa tangkang makuha ang WBC welterweight title. Bagama’t hindi niya nasungkit ang titulo, pinatunayan ng kanyang performance laban sa mas batang kalaban na kaya pa niyang makipagsabayan sa mataas na antas ng boxing.

Tuloy ang impresibong kampanya ni Alex Eala sa Dubai Duty Free Tennis Championships matapos niyang talunin si Sorana Cîrstea sa Round of 16, 7-5, 6-4, upang umabante sa quarterfinals.

Tinapos ng 20-anyos na Pinay, na kasalukuyang World No. 47, ang laban sa loob ng isang oras at 38 minuto laban sa World No. 32 na Romanian. Sa unang set, muntik na siyang maungusan nang mahabol sa 4-5, ngunit nagwagi siya sa huling tatlong laro, kabilang ang kritikal na ika-12 game para makuha ang set.

Dinala ni Eala ang momentum sa ikalawang set at agad nagtala ng 4-0 bentahe. Bagama’t nakabawi si Cîrstea at nakalapit sa 4-5, nanatiling kalmado ang Filipina at tinapos ang laban sa pamamagitan ng matatag na service game.

Ayon kay Eala, susi sa kanyang panalo ang pananatiling kalmado at pagtitiwala sa kanyang mga tira. Nagpasalamat din siya sa suportang natatanggap mula sa mga manonood.

Sa susunod na yugto, haharapin niya ang World No. 4 na si Coco Gauff, na nagwagi laban kay Elise Mertens. Matinding hamon ang naghihintay kay Eala, ngunit may kumpiyansa siya matapos talunin kamakailan ang World No. 8 na si Jasmine Paolini sa nakaraang round.