Lalaban ang UE Red Warriors sa inaasahang isang-game suspension ng kanilang big man na si Precious Momowei, ayon kay Coach Jack Santiago.
Matapos ang pisikal na laban kontra UST Growling Tigers na nauwi sa 67-76 pagkatalo, inaasahang sususpindihin si Momowei dahil sa dalawang aksidenteng pangyayari na nagdulot ng injury sa dalawang manlalaro ng UST. Unang nasaktan si Mo Tounkara sa unang half matapos ang isang unsportsmanlike foul, at si Gelo Crisostomo naman sa fourth quarter matapos mabagsakan ng siko ni Momowei sa kilay, dahilan para tuluyang madisqualify si Momowei.
Bagama’t humingi na ng tawad si Momowei sa Tigers, umaasa pa rin ang UE na aaprubahan ang kanilang apela. ‘Di naman bago sa Red Warriors ang pagharap sa matinding laban kahit walang import—isang bagay na pinuri ni Coach Santiago sa kanyang mga manlalaro.
Abangan ang susunod na laban ng Red Warriors kontra Ateneo Blue Eagles ngayong Sabado sa FilOil EcoOil Centre sa San Juan.