Naghain si Senador Raffy Tulfo ng panukalang batas na layong tiyakin ang madali at abot-kayang serbisyong pangkalusugan para sa mga guro sa pampublikong paaralan at kanilang mga dependents.
Sa Senate Bill 1585, binigyang-diin ni Tulfo ang mga pag-aaral na nagpapakita ng mataas na antas ng stress, altapresyon, at mga problemang musculoskeletal sa mga guro—mga sakit na lalong lumalala dahil sa kakulangan ng access sa preventive health care. Ayon din sa World Health Organization, mas mataas ang panganib ng burnout at chronic fatigue ng mga educator kapag kulang ang suportang medikal.
Sa kabila nito, sinabi ni Tulfo na kulang at pira-piraso pa rin ang benepisyong pangkalusugan ng mga guro kumpara sa ibang kawani ng gobyerno na may sariling medical privileges.
Sa ilalim ng panukala, inaatasan ang lahat ng state hospitals na magbigay ng kumpletong serbisyong medikal—mula preventive hanggang rehabilitative—magpatupad ng hindi bababa sa 10% diskuwento sa konsultasyon at pagpapa-ospital, at magtayo ng fast-lane facilities para sa mga guro. Layunin nitong mapabuti ang kalusugan at kapakanan ng mga guro na itinuturing na haligi ng edukasyon sa bansa.