Nagbabala si US President Donald Trump na magpapataw siya ng 100 porsiyentong taripa sa lahat ng produktong galing Canada kung itutuloy nito ang isang kasunduan sa kalakalan sa China.
Ang babala ay kasunod ng pahayag ni Canadian Prime Minister Mark Carney tungkol sa isang “paunang ngunit mahalagang” trade agreement sa China na layong magbaba ng taripa. Ayon kay Trump, hindi niya papayagang maging “daan” ang Canada para makapasok ang mga produktong Chinese sa Estados Unidos.
Sa social media, mariing sinabi ni Trump na agad niyang ipatutupad ang mabigat na taripa kapag natuloy ang kasunduan. Tinawag pa niyang “Governor” si Carney—isang patutsada kaugnay ng madalas niyang biro na dapat maging ika-51 estado ng US ang Canada.
Tumugon naman ang Canada at iginiit na walang itinutulak na free trade deal sa China, kundi pag-aayos lamang ng ilang isyu sa taripa. Iginiit din ni Carney na “umuunlad ang Canada dahil sa pagiging Canadian,” kahit kinilala niya ang matagal nang partnership ng dalawang bansa.
Malaki ang nakataya sa sigalot dahil higit tatlong-kapat ng exports ng Canada ay patungong US. Samantala, inaasahang magsisimula ngayong taon ang negosasyon sa pagrepaso ng North American free trade agreement, habang patuloy ang pangamba ng mga negosyo sa posibleng epekto ng lumalalang tensyon sa kalakalan.