Inihayag ni Donald Trump nitong Sabado na ang maraming kagamitan na inorder ng Israel ay kasalukuyan nang naipapadala. Ayon sa kanyang post sa Truth Social, “Maraming bagay na inorder at binayaran na ng Israel, ngunit hindi naipadala ni Biden, ay ngayon papunta na!”
Ang pahayag ni Trump ay kasunod ng ulat na sinuspinde ng administrasyon ni Joe Biden noong nakaraang taon ang pagpapadala ng mga 2,000-pound bombs sa Israel. Ang suspensyon ay nangyari nang tila naghahanda ang Israel ng isang malaking ground operation sa densely populated na bahagi ng Gaza, bagay na tinutulan ng Washington.
Binalaan ni Biden na ang paggamit ng ganitong mga bomba sa mga lugar na maraming sibilyan ay magdudulot ng “malaking human tragedy at pinsala.”
Sa huling mga araw ni Biden bilang pangulo, nagkaroon ng tentative na tigil-putukan sa pagitan ng Israel at Hamas na naglalayong tapusin ang digmaan sa Gaza. Matagumpay namang nailipat ang ikalawang grupo ng mga hostage mula sa magkabilang panig nitong weekend.
Bagama’t hindi direktang tinukoy ni Trump kung ano ang mga armas na ipinapadala sa Israel, isang ulat mula kay Barak Ravid ng Axios ang nagsasabing inatasan daw ni Trump ang Defense Department na alisin ang hold na ipinataw ni Biden sa mga 2,000-pound bombs.
Sa kanyang unang termino, madalas ipagyabang ni Trump na siya ang “pinakamahusay na kaibigan ng Israel sa White House.” Gayunpaman, nagkaroon ng lamat ang relasyon nila ni Israeli Prime Minister Benjamin Netanyahu matapos nitong batiin si Biden sa pagkapanalo noong 2020 elections. Si Trump, na iginiit na nanalo siya sa nasabing halalan, ay nag-akusa kay Netanyahu ng kawalan ng katapatan.