US President Donald Trump sinabi nitong Sabado na makikipag-usap siya kay Russian President Vladimir Putin sa telepono sa Lunes para tapusin ang “bloodbath” o madugong labanan sa Ukraine. Ito ay isang araw matapos ang unang direktang pag-uusap ng Russia at Ukraine sa loob ng mahigit tatlong taon.
Pinipilit ni Trump na makakuha ng 30-araw na walang kondisyon na tigil-putukan. Sinabi ng tagapagsalita ng Kremlin na si Dmitri Peskov na inihahanda na ang tawag.
Sinabi naman ng Kremlin na posible lamang ang personal na pagkikita nina Putin at Ukrainian President Volodymyr Zelensky kung magkakaroon ng kasunduan ang dalawang panig.
Nangyari ang mga ito isang araw matapos magkasundo ang dalawang bansa sa pagpapalitan ng mga bilanggo, isang hakbang na bahagi ng proseso ng diplomatikong usapan.
Sa kabila nito, isang drone attack ng Russia sa isang minibus na may mga sibilyang inilikas sa eastern Ukraine ang pumatay ng siyam na tao at sugatan ang lima. Mariing kinondena ito ni Zelensky at tinawag na dahilan para palakasin ang mga parusa laban sa Moscow.
Ani Zelensky, “Walang tunay na diplomasya kung walang matatag na parusa at pressure sa Russia.”
Sa unang direktang pag-uusap sa Istanbul noong Biyernes, napagkasunduan ang pagpapalitan ng 1,000 bilanggo mula sa magkabilang panig. Sinabi ni Defense Minister Rustem Umerov na ang susunod na hakbang ay ang personal na pagpupulong nina Zelensky at Putin.
Ayon sa Kremlin, posible ang pagpupulong pero dapat may matibay na kasunduan muna.
Si Vladimir Medinsky, pinuno ng delegasyon ng Russia, ay nagsabi na ipapakita ng magkabilang panig ang kanilang mga plano para sa tigil-putukan, ngunit walang tiyak na petsa.
Ipinahayag ni Trump sa social media na nais niyang makipag-usap kay Putin para itigil ang madugong labanan at pagkatapos ay makikipag-ugnayan din siya kay Zelensky at sa mga opisyal ng NATO.
Kabilang sa mga nangyari sa digmaan, nasakop ng hukbong Ruso ang Oleksandropil, isang lugar sa eastern Donetsk na matindi ang labanan. Patuloy rin ang missile at drone attack sa iba’t ibang bahagi ng silangang Ukraine, na nagresulta sa mga nasawi at sugatan.
Kritikal si Zelensky sa Russia, sinabing natatakot si Putin at hindi seryoso sa usapan dahil hindi siya dumalo sa mga pulong sa Turkey. Nanawagan siya ng tunay na hakbang upang matapos ang digmaan.
Nagplano rin si Zelensky ng mga bagong parusa laban sa Russia kasama ang Canada, habang sinasabing hindi katanggap-tanggap ang mga teritoryal na hinihingi ng Moscow.
Patuloy ang tensyon habang naghahanap ang mga bansa ng daan para matapos ang digmaan na nagdulot ng matinding pinsala sa Ukraine.