Pinalakas ni Donald Trump ang maling balita sa social media na gumagamit daw si Kamala Harris ng artificial intelligence para pekein ang larawan ng kanyang mga tagasuporta sa isang rally sa Michigan noong nakaraang linggo—isang alegasyon na pinabulaanan ng mga larawan at video.
“Napansin niyo ba na nandaya si Kamala sa airport? Walang tao sa eroplano, pero nag-‘A.I.’ siya at pinakita ang napakaraming ‘tagasunod,’ PERO WALA SILA TALAGA!” ani Trump sa isang serye ng post noong Linggo sa kanyang Truth Social platform.
“Talagang walang tao doon!” dagdag pa niya.
Ngunit, ipinakita ng live footage at mga larawan mula sa iba’t ibang media outlet, kabilang ang AFP, na puno ng mga tagasuporta ang isang hangar sa paliparan at umapaw pa sa tarmac upang makita sina Harris at ang kanyang bagong running mate na si Tim Walz.
Ang larawan ay unang ipinost ng isang opisyal ng Harris campaign na nakuha ito mula sa isa pang staffer.
“Totoong larawan ito ng 15,000 na tao para sa Harris-Walz sa Michigan,” post ng campaign’s official rapid response page sa social media platform na X.
Ibinahagi rin ng kampo ang orihinal na kopya ng larawan sa BBC, na nagsabing “hindi ito binago ng AI sa kahit anong paraan.”
Sinuri ng Drexel University digital forensic expert na si Matthew Stamm ang larawan para sa AFP at sinabing walang ebidensya ng AI sa imahe.
Ganito rin ang naging pahayag ni Hany Farid ng University of California-Berkeley, na nagsabing walang natagpuang bakas ng AI sa imahe.
Ang maling balitang ito ay kumalat sa mga right-wing at conspiratorial social media circles bago nakarating kay Trump, na nag-share ng post mula sa conservative commentator na si Chuck Callesto na tumutok sa kawalan ng repleksyon ng crowd sa gilid ng eroplano.
Ayon sa mga eksperto, malamang na hindi direktang sumalamin ang crowd dahil sa layo nito sa eroplano at anggulo ng repleksyon.
Ang Trump campaign ay hindi nagbigay ng komento ukol dito.