Humihiling ang pitong transport groups sa gobyerno, sa pamamagitan ng Insurance Commission, ng makatarungang kompensasyon para sa mga kaso ng pagkamatay at permanenteng kapansanan ng mga pasahero.
Ang “Magnificent 7” na kinabibilangan ng Pasang Masda, Alliance of Transport Operators and Drivers Association of the Philippines, Alliance of Concerned Transport Organizations, Federation of Jeepney Operators and Drivers Association of the Philippines, Stop and Go Transport Coalition, Liga ng Transportasyon at Operators sa Pilipinas, at UV Express National Alliance of the Philippines, ay nagpetisyon matapos maglabas ang Insurance Commission ng memorandum circular na nagdaragdag sa insurance coverage ng “Compulsory Motor Vehicle Liability Insurance (CMVLI).
Ayon kay ALTODAP President Melencio “Boy” Vargas, habang pinahahalagahan nila ang inisyatiba ng Insurance Commission, kailangan ng paglilinaw sa insurance coverage lalo na sa mga kaso ng maraming biktima ng aksidente sa kalsada.
Sa bagong memorandum circular ng IC, ang insurance coverage para sa pagkamatay ay P200,000 at P50,000 para sa permanenteng kapansanan.
Ngunit ayon kay Vargas, sa kasalukuyang sistema, ang P200,000 insurance para sa pagkamatay at P50,000 para sa permanenteng kapansanan ay pantay-pantay na hinahati sa mga biktima.
Sinabi ni Vargas na ang sistemang ito ay hindi lamang makikinabang sa mga pasahero ng pampublikong sasakyan kundi pati na rin sa mga pribadong sasakyan.