Tatlong tao ang nasawi at 10 ang sugatan matapos magkarambola ang isang trailer truck at limang sasakyan sa Fortune Avenue, Marikina noong Miyerkules ng gabi.
Ayon sa mga awtoridad, ang 40-foot container truck ay pababa sa isang matarik na kalsada sa Barangay Fortune nang mawalan ng kontrol ang driver na si Gabriel Almeda, 54-anyos, sanhi ng pagkasira ng preno. Pumalikwas ang truck at bumangga sa dalawang jeepney, isang kotse, isang SUV, at isang sedan.
Sa insidente, nasawi ang isang jeepney driver, isang babae, at ang anak nito. Samantala, 10 ang nasugatan at dinala sa ospital, kabilang ang isang babae na natagilid at naipit sa loob ng jeepney.
Si Almeda, na nasa kustodiya na ng pulisya, ay nahaharap sa kasong reckless imprudence resulting in homicide, physical injuries, at damage to property. Ang LTO ay nag-isyu ng show-cause order sa driver at may-ari ng truck upang alamin kung may kapabayaan sa maintenance ng truck o kondisyon ng driver. Ipinag-utos na rin ang suspensyon ng driver’s license ni Almeda habang nagpapatuloy ang imbestigasyon.